सिटिजन्स बैंक इन्टरनेसनलको ११ लाख कित्ता शेयर बिक्रीमा

१७ जेठ, काठमाडौ । सिटिजन्स बैंक इन्टरनेसनलको ११ लाख कित्ता शेयर बिक्रीमा राखिएको छ। बैंकको संस्थापक शेयरधनी तारा बिष्टको नाममा रहेको ११ लाख कित्ता संस्थापक शेयर बिक्रीमा राखेको हो। यो शेयरमा हाललाई विद्यमान संस्थापक शेयरधनीहरुले मात्रै खरिद आवेदन दिन पाउनेछन्। 

बिक्रीमा राखिएको सेयरको न्यूनतम मूल्य प्रतिकित्ता १३५ रुपैयाँ तोकिएको छ। यसको अर्थ लगानीकर्ताले खरिद आवेदन दिन न्यूनतम मूल्य वा सोभन्दा बढी रकम बोलकबोल गर्नुपर्नेछ। 

संस्थापक शेयरधनीहरुलाई शेयर खरिदका लागि ३५ दिनको अवधि दिइएको छ। यो अवधिभित्र संस्थापक शेयरधनीहरुले काठमाडौंको नारायणहिटी पथमा रहेको बैंकको केन्द्रीय कार्यालयमा आफूले लिन चाहेको शेयर संख्या खुलाएर खरिद आवेदन दिनुपर्नेछ। 

तोकिएको अवधिभित्र संस्थापक शेयरधनीहरुबाट खरिद आवेदन नपरेको खण्डमा अन्य व्यक्ति तथा संस्थाका लागि शेयर बिक्री खुला गरिने बैंकले जनाएको छ।