गोताखोरकाे सहायतामा सुनकोशी नदीमा बेपत्ताहरुको खोजी कार्य जारी

१९ जेठ, काठमाडौं । सिन्धुलीस्थित सुनकोशी नदीमा शुक्रबार बिहान सरकारी नम्बर प्लेटको जीप खस्दा बेपत्ता भएका ३ जनाको खोजीका लागि प्रहरीले गोताखोर परिचालन गरेको छ । 

सिटिइभिटीको बा १ झ ७४६७ नम्बरको गाडी शुक्रबार बिहान करिब साढे ११ बजेतिर सिन्धुलीको गोलञ्जोर  गाउँपालिका–७ लौकुनबाट गाडी सुनकोशी नदीमा खसेको थियो । जीप चालक दाङका कृष्ण चौधरी पौडिएर बच्न सफल भएपनि अन्य ३ जना भने बेपत्ता भएका छन् । बेपत्ता तीनै जना सिटिइभिटीका अधिकारीहरु रहेको प्रहरीले जनाएको छ । 

बेपत्ता हुनेमा तनहुँ भानु नगरपालिका–९ घर भइ सीटीईभीटीको सानोठिमीस्थित कार्यालयका प्रशासन शाखाका निर्देशक सहसचिव कृष्णबहादुर केसी, पूर्वीनवलपरासी प्रगति नगरपालिका–७ का घर भइ हाल योजना महाशाखाका निर्देशक यमप्रसाद घुर्तेल र इलाम फुयतया नगरपालिका–५ घर भइ हाल विद्युत् प्रशिक्षकका रुपमा कार्यरत भानु पौडेल छन्। उनीहरुको खोजीका लागि सशस्त्र प्रहरी बलको गोताखोर परचालन गरिएको हो । खोजी कार्य जारी रहेकाे सन्धुलीका प्रहरी नायब उपरीक्षक (एसपी) चिरञ्जीवी दाहालले बताए ।

खोजी कार्यमा सिन्धुली र रामेछाप प्रहरी जुटेका छन् । काठमाडौं  सिनामंगलस्थित सशस्त्र प्रहरी बल, नेपाल  नं. २० विपद् उद्धार उपत्यका गणबाट सशस्त्र प्रहरी नायब निरीक्षक कमान्डको ७ जना गोताखोर टोली खटिएको छ ।