नक्कली भुटानी शरणार्थी मुद्दामा अभियुक्तका वकिलले जेठ ३० भित्र बहस सक्नुपर्ने

२१ जेठ, काठमाडौं । आइतबारबाट काठमाडौं जिल्ला अदालतका न्यायाधीश प्रेमप्रसाद न्याँ न्याैपानेको इजलासमा सुरु भएको थुनछेक बहसमा मुद्दाका वादी अर्थात सरकारी वकिलको तर्फबाट बहस सुरु भएको छ । आज जिल्ला सरकारी वकिलको कार्यालयका सहन्यायाधिवक्ता महेश खत्रीले बहस गरेका छन् । अन्य वकिलहरु जनक घिमिरे, सीताराम अर्याल, दिनेश भट्टराई, शेरबहादुर परियार, निर्मला मरासिनी र प्रकाश घिमिरेले बहस गर्नेछन् । 

न्यायाधीश न्यौपनेले थुनछेक बहसमा जेठ ३१ गते आदेश आउने गरी समय विभाजन गरेका छन् । जसअनुसार आज, भोलि र पर्सि मंगलबारसम्म सरकारी वकिलले बहस गर्नेछन्  । यसपछि बुधबारदेखि अर्को मंगलबार अर्थात जेठ ३० गतेसम्म ६ दिन प्रतिवादीतर्फका वकिलले बहस गर्ने तालिका निर्धारण गरिएको छ । प्रतिवादीको बहस सकेपछि जेठ ३१ गते बुधबार सरकारी वकिलले जवाफी बहस सक्नुपर्नेछ । जवाफी बहस सकिएपछि त्यही दिन आदेश आउनेछ । बहसका क्रममा इजलासमा संचारकर्मीलाई प्रवेश निषेध गरिएको छ ।

थुनछेक बहसका लागि पूर्वगृहमन्त्री समेत रहेका नेपाली कांग्रेस नेता बालकृष्ण खाण, पूर्वउपप्रधानमन्त्री समेत रहेका एमालेका सांसद टोपबहादुर रायमाझीसहित १८ अभियुक्तलाई प्रहरीले काठमाडौंका विभिन्न हिरासतमा राखिएका १८ जनालाई अदालतमा उपस्थित गराएको छ । मुद्दाका ३० प्रतिवादीमध्ये १२ जना फरार छन् । उनीहरुको खोजीका लागि प्रहरीले इन्टरपोलमा सूचना राख्ने तयारी गरेको छ ।

उनीहरुविरुद्ध ठगी, संगठित अपराध, सरकारी लिखत कीर्ते र राज्यविरुद्ध कसुर गरी ४ वटा मुद्दा चलाइएको छ । साथै नेपालीलाई नक्कली भुटानी शरणार्थी बनाएर अमेरिका उडाउने भनी झुक्याएर संगठित रुपमा ठगी गरेको अभियोगसहित २८ करोड रुपैयाँभन्दा बढी बिगो र उतिनै रकम जरिवाना र सजायको माग गरिएको छ ।

यो पनि पढ्नुहोस