नागरिकता विधेयक प्रमाणिकरणविरुद्धको मुद्दामा सर्वोच्चद्वारा अल्पकालीन आदेश

२१ जेठ, काठमाडौं । नागरिकता विधेयक प्रमाणिकरणविरुद्धको मुद्दामा सर्वोच्च अदालतले अल्पकालीन आदेश जारी गरेको छ । अन्तरिम आदेशका लागि मुद्दाका दुवै पक्षलाई छलफलमा बोलाउने आदेश भएको छ । न्यायाधीश मनोकुमार शर्माको एकल इजलासले आइतबार मुद्दामाथि प्रारम्भिक सुनुवाइ गर्दै यस्तो आदेश दिएको हो । 

आदेशसँगै जेठ १७ मा राष्ट्रपति रामचन्द्र पौडेलबाट प्रमाणिकरण भई जेठ १९ मा राजपत्रमा प्रकाशितपछि ऐनको रुपमा लिएका सरकारलाई ऐन कार्यान्वन गर्न रोक लागेको छ ।

रिटका विपक्षी राष्टपति कार्यालयको नाममा कारण देखाउ आदेश जारी भएको छ । साथै रिटनिवेदकको माग बमोजिम अन्तरिम आदेश जारी हुने वा नहुनेबारे टुंगो लगाउन छलफलमा पनि समेत बोलाएको छ ।

प्रमाणिकरण कार्य संविधान विपरीत भएको भन्दै वरिष्ठ अधिवक्ता सुरेन्द्र भण्डारी, बालकृष्ण न्यौपानेसमेतले प्रमाणिकरण बदरको माग गर्दै शुक्रबार रिट दायर गराएका थिए ।