संसदमा दिइने अभिव्यक्तिको परीक्षण गर्न पोलिग्राफ मेशिन राखाैं : महासेठ

२४ जेठ, काठमाडौं । संसदको प्रमुख प्रतिपक्षी दल नेकपा (एमाले)का सांसद रघुवीर महासेठले संसदमा झुट बोले नबोलेको पत्ता लगाउन पोलिग्राफ परीक्षणको व्यवस्था गर्नुपर्ने बताएका छन् । 

बुधबार प्रतिनिधि सभामा बजेटमाथि छलफलको क्रममा पूर्वमन्त्री समेत रहेका सांसद महासेठले  प्रधानमन्त्रीको भारत भ्रमणपछिको  संसदमा कसको भनाइ सत्य र कसको झुट भन्ने छुट्याउन कठिन भएकाले साँचो कुरा पत्ता लगाउन संसदमै पोलिग्राफ परीक्षणको व्यवस्था हुनुपर्ने बताए । 

प्रधानमन्त्री प्रचण्डको हालै भएको भारतको ४ दिने औपचारिक भ्रमणमा भएको सम्झौताका विषयलाई लिएर सत्ता पक्ष र प्रतिपक्षी दलका सांसदहरुबीत जुहारी नै चलेको थियो । भ्रमणबारे संसदमा जानकारी दिने क्रममा प्रधानमन्त्रीले झुट बोलेको भन्दै एमाले लगायत प्रतिपक्षी दलका सांसदहरुले पटकपटक बैठक अवरुद्ध पारेका थिए । उनीहरुले प्रधानमन्त्रीले भारतमा रहँदा र नेपाल फर्किएपछि फरकफरक अभिव्यक्ति दिएको दाबी उनीहरुले गरेका छन् । 

बजेटमाथिको छलफलमा महासेठले वीरगञ्ज–काठमाडौँ र रसुवा–काठमाडौं रेलमार्गको डिपिआर ढिला हुनुमा सरकार जिम्मेवार रहेको बताए । उनले सरकारले बजेटमा सुनकोसी मरिण, भेरी बबई र रानी जमरालगायत सिँचाइ आयोजनाको कामलाई प्राथमिकतामा नराखेको भन्दै आक्रोश पोखे । 

छलफलका क्रममा प्रतिपक्षी दलका सांसदहरुले बजेट र सरकारको चर्को आलोचना गरेका छन् भने सत्ता पक्षका सांसदहरुले बजेटमा देश र जनताको आकांक्षा समेटएिको भन्दै समर्थन गरेका छन् । सरकारकाे बचाउ गरिरहेका छन् ।