बजेटमा एकात्मक राज्य प्रणाली र दलाल पूँजीवादको झल्को पाइन्छ : सांसद घर्ती

२५ जेठ, काठमाडौं । सरकारको नेतृत्व गरिरहेको दल नेकपा (माओवादी केन्द्र)का सांसद पूर्णबहादुर घर्तीले सरकारले आगामी आर्थिक वर्षा २०८०/८१ को बजेट एकात्मक र नोकरशाही दलाल पूँजीवादी केन्द्रित रहेको बताएका छन् । 

बिहीबार प्रतिनिधिसभाको बैठकमा बजेटको वार्षिक अनुमानित राजश्व तथा व्ययको छलफलका क्रममा धारणा राख्दै सांसद घर्तीले कृषि र शिक्षाका आकर्षक नारा तय गरिएपनि कार्यान्वयनको पाटो अन्यौल रहेको बताए । बजेटको उद्देश्य र चरित्र नोकरशाही दलाल पूँजीपतिको हित गर्ने र गरिबलाई आशामा सीमित गराउने किसिमका रहेको बताए । 

किसानको पक्षमा आकर्षक नारा दिइए पनि काम गर्ने किसान भन्दाकाम नै नगर्ने धनी वर्ग झनझन धनी बन्दै जाने किसिमबाट आएको बताए । धनीलाई थप धनी हुनबाट आंशिक रुपमा रोक्दै गरिबलाई छिटो उकास्ने नीति नै बजेटमा नरहेको र निमुखा वर्ग उत्थान गर्न ठोस कार्यक्रम नहुँदा बजेट कुहिरोका काग बन्ने अवस्थामा रहेको बताए । बजेट समाजवाद उन्मुख नभई दलाल पूँजीवादी व्यवस्था उन्मुख रहेको उनको भनाइ छ ।
बजेटले सहकारीका बचतकर्ताको रकम सुरक्षाबारे ठोस नीति नरहेको उनको टिप्पणी छ ।

ठोस नीतिको अभावमा श्रमजीवि वर्गका बचत रकमलाई धनीहरुले चलाएका सहकारीका संचालकहरु पैसा बोकेर बेपत्ता हुँदा पनि पक्राउ गर्न राज्य सफल हुन नसकेको बताए । ‘सहकारी धनीको हातमा परेका कारण बचतकर्ताहरुले आफ्नै पैसा पाउन रुँदै हिड्न विवश छन्’  सांसद घर्तीले भने, ‘पैसा खाने सुदखोर र दलालहरु खुलेआम हिँडुडुल गर्न पाइरहेका छन् ।’