मोरङमा बसको ठक्करबाट स्कुटर चालकको मृत्यु, बसमा आगजनी

२५ जेठ, काठमाडौं । मोरङको उर्लाबारी नगरपालिका–३, नयाँ मंगलबारेमा आज दिउँसो तीन बजे बसले स्कुटरलाई ठक्कर दिँदा स्कुटर चालकको मृत्यु भएको छ । ठक्करबाट स्कुटर चालककाे मृत्यु भएकाे छ ।

मोरङ सडक दुर्घटनापछि आक्रोशित स्थानीयवासीले बसमा आगजनी गरेका छन् । बिहीबार पूर्व–पश्चिम राजमार्गमा पश्चिमबाट पूर्वतर्फ आउँदै गरेको मे १ ख ३०७३ नम्बर बसले पूर्वबाट पश्चिमतर्फ जाँदै गरेको प्र १–०१–०१३ प २९० नम्बरको स्कुटरलाई ठक्कर दिँदा स्कुटर चालकको मृत्यु भएको थियो ।

मृतकको पहिचान खुल्न नसकेको प्रहरीले जनाएको छ । ठक्करपछि आक्रोशित स्थानीयले बसमा आगजनी गरेका छन् । बसका चालक झापा कनकाई नगरपालिका–३ बस्ने ३२ वर्षीय टंकप्रसाद सुवेदीलाई इलाका प्रहरी कार्यालय उर्लाबारीले नियन्त्रणमा लिएको छ । 

आगजनीपछि घटना क्षेत्रमा राजमार्ग अवरुद्ध भएको छ । आगजनीबाट बस क्षतिग्रष्त भएको छ ।