प्रस्तावित प्रधानन्यायाधीश कार्कीविरुद्व बहालवाला न्यायाधीशदेखि कर्मचारीसम्मका उजुरी

२६ जेठ, काठमाडौं । प्रधानन्यायाधीशमा सिफारिस भएका कामु प्रधानन्यायाधीश हरिकृष्ण कार्कीविरुद्ध बिहीबारसम्म १९ वटा उजुरी परेका छन् । नियुक्ति प्रक्रिया पूरा गर्न संसदीय समितिले जेठ १६ गते गरेको उजुरी आह्वान यता बिहीबारसम्म १९ उजुरी दर्ता भएको समितिले जनाएको छ । 

कार्कीविरुद्ध बहालवाला जिल्ला न्यायाधीश, वकिल र सर्वोच्च अदालतका कर्मचारीसहित अन्यले उजुरी दिएका छन् । संसदीय सुनुवाइ समितिमा शुक्रबार ३ बजेसम्म उजुरी दर्ता गराउने समय तोकिएको छ। उजुरी निवारणका लागि सुनुवाइ समितिको बैठक आइतबार बस्दैछ । 

कार्की सुनुवाइ समितिमा परेका उजुरीहरूको जवाफ दिन सफल भएमा राष्ट्रपति रामचन्द्र पौडेलबाट नियुक्ति हुनेछन् । प्रधानमन्त्रीको अध्यक्षतामा रहने संवैधानिक परिषदको बैठकले कार्कीलाई प्रधानन्यायाधीश नियुक्तिका लागि सिफारिस गरेको थियो ।