नागरिकता विधेयक प्रमाणीकरणविरुद्धको मुद्दामा कागजात मगाउने आदेश

२६ जेठ, काठमाडौं । राष्ट्रपति रामचन्द्र पौडेलबाट जेठ १७ गते भएको नागरिकता विधेयक प्रमाणीकरणविरूद्धकाे मुद्दामा विधेयककाे प्रति  मगाउन सर्वोच्च अदालतले आदेश दिएको छ । 

शुक्रबार न्यायाधीशद्वय प्रकाशमान सिंह राउत र सुष्मालता माथेमाको संयुक्त इजलासले प्रमाणीकरणको कपी मगाउने आदेश दिएको हो ।  सर्वोच्चले राष्ट्रपतिबाट भएको प्रमाणीकरणको कपी मगाउने र अन्तरिम आदेश दिनु पर्ने कि नपर्ने भन्ने सम्बन्धमा छलफलका लागि जेठ ३० गते मंगलबारको पेसी तोक्ने आदेश गरेको छ ।

नागरिकता विधेयक प्रमाणीकरण संविधानको भावना र मर्मविपरीत भन्दै वरिष्ठ अधिवक्ता सुरेन्द्र भण्डारी र अधिवक्ता बालकृष्ण न्यौपानेले सर्वोच्चले कार्यन्वयन नगर्न भन्दै जेठ १९ मा रिट दर्ता गराएका थिए ।

जेठ १९ गते दर्ता भएको उक्त रिटमाथि जेठ २१ गते न्यायाधीश मनोजकुमार शर्माको एकल इजलासले अल्पकालीन अन्तरिम आदेश जारी गर्दै उक्त ऐन कार्यन्वयन नगर्न÷नगराउन आदेश दिएपछि कार्यान्वयनमा रोक लागेको छ । 

संघीय संसदको दुवै सदनमा बोल्ने अधिकांश सांसदहरुले विधेयकलाई संसदमा फिर्ता ल्याएर छलफल गराई प्रमाणीकरणका लागि राष्ट्रपति पेस गर्नुपर्ने बताएका छन् ।