दिवंगत पूर्वसभासद चौधरीको निधनमा शोक प्रस्ताव पारित, प्रतिनिधिसभाको अर्को बैठक २८ गते

२७ जेठ, काठमाडौं । प्रतिनिधिसभाको शुक्रबारको बैठकले पूर्वसभासद महेश चौधरीको निधनमा शोक प्रस्ताव पारित गरेको छ । बैठकको अन्तिम समयमा सभामुख देवराज घिमिरेले बैठकमा चौधरीको निधनमा शोक प्रस्ताव राखेका थिए । प्रस्तावलाई सदस्यहरुले पारित गरेका छन् । निधनमा एक मिनेट मौनधारण गरिएको थियो । 

चौधरी २०६४ को संविधानसभा निर्वाचनमा एमालेको तर्फबाट दाङबाट निर्वाचित भएका थिए । लामो समयदेखि बिरामी रहेका चौधरीको यही जेठ २४ गते निधन भएको थियो ।

आजको बैठमा सरकारले प्रस्तुत गरेको आगामी आर्थिक वर्ष २०८०/८१ को बजेटमाथि सांसदहरुले धारणा र सुझाव राखेका थिए । अर्को बैठक जेठ २८ गते बिहान ११ बस्ने सभामुख घिमिरेले सदनलाई जानकारी दिए । २८ गतेको बैठकमा अर्थमन्त्री डा. प्रकाशशरण महतले सदनमा उठेका प्रश्नहरुको जवाफ दिने कार्यक्रम रहने जानकारी पनि घिमिरेले दिए ।