आँखुखोला जलविद्युत कम्पनीको साधारणसभा २२ असारमा, बुक क्लोज कहिले ?

२८ जेठ, काठमाडौं । आँखुखोला जलविद्युत कम्पनीले १५ औं वार्षिक साधारणसभा असार २२ गते बोलाएको छ । सभा, अर्पण ब्यांक्वेट, नयाँ बानेश्वर काठमाडौमा बिहान ११ बजेबाट सुरु हुनेछ । सभामा १५० प्रतिशत हकप्रद शेयर जारी गर्ने विशेष प्रस्ताव पेस हुँदै छ । 

गणेश हिमाल हाइड्रोपावरले २० मेगावाटको आँखुखोला–२ जलविद्युत आयोजना निर्माण गर्न लागेको छ । सो आयोजनामा ६० प्रतिशत लगानी गर्न र बैंकको ऋण भुक्तानी गर्नको लागि कम्पनीले हकप्रद शेयर निष्काशन गर्न लागेको जनाएको छ । 

यस्तै, सभामा आर्थिक वर्ष २०७८–७९ को वार्षिक प्रतिवेदन, नाफ–नोक्सान हिसाब तथा नगद प्रवाह विवरणमा पनि छलफल हुनेछ । यस्तै, आर्थिक वर्ष २०७९–८० को लागि लेखापरीक्षक नियुक्त गर्ने एजेन्डा पनि छ । कम्पनीको प्रबन्धपत्र तथा नियमावली संशोधन गर्ने प्रस्ताव  पनि रहेको छ । 

सभा प्रयोजनको लागि कम्पनीले असार ३ गते बुक क्लोज गर्ने जनाएको छ । यसर्थ, असार २ गतेसम्म कायम शेयरधनी मात्र कम्पनीको सभामा भाग लिन सक्नेछन् ।