जसपाले चुनावमा अन्तर्घात गर्नेहरूमाथि कारबाहीको डण्डा चलाउने

२८ जेठ, काठमाडौं । सत्तारुढ दल जनता समाजवादी पार्टी नेपाल (जसपा)ले २०७४ को प्रतिनिधि सभा र प्रदेश सभामा चुनावमा अन्तर्घात गर्ने नेता र  कार्यकर्तामाथि कारवाहीको डण्डा चलाउने भएको छ । शनिबार बसेको कार्यकारिणी समितिको बैठकले गरेको यस्तो निर्णय गरेको हो । 

बैठकले चुनावमा अन्तर्घात गर्नेलाई पार्टीको विधानबमोजिम कारबाही गर्ने निर्णय लिएको कार्यकारिणी सदस्य मृगेन्द्रकुमार सिंह यादवले बताए । उनका अनुसार दोषी देखिएका नेता कार्यकर्तालाई उनीहरु आवद्ध रहेकै समितिले कारवाही गर्नेछ । 

जसअनुसार स्थानीय तहमा रहेकालाई स्थानीय समिति, जिल्लामा रहेकालाई जिल्ला समन्वय समिति, प्रदेशमा रहेकालाई प्रदेश समिति तथा केन्द्रमा रहेकालाई केन्द्रीय कमिटीले कारबाही गर्ने उनले बताए । कारबाहीमा पार्टी सदस्यबाट निलम्बन गर्नेदेखि नसिहतसम्म गर्न सकिने अख्तियार दिइएको छ ।

मङ्सिर ४ गते सम्पन्न आम चुनावमा जसपाका अध्यक्ष उपेन्द्र यादव राप्तरी २ बाट पराजित भएपछि त्यसको अध्ययन तथा छानबिनका लागि कार्यकारिणी सदस्य शिवलाल थापाको संयोजकत्वमा गठित कार्यदलको प्रतिवेदनका आधारमा कारवाहीको निर्णय लिइएको हो ।

कार्यादलले उजुरी परेका नेता कार्यकर्ताहरुमाथि लिखित र मौखिक बयान लगायत पक्रिया पूरा गरी सूचीसहित कारवाहीका लागि सिफारिस गरेको थियो ।

सिफारिससहित अध्यक्ष उपेन्द्र यादवलाई बुझाइएको प्रतिवेदन कार्यान्वयन नभएको भन्दै पार्टीभित्र असन्तुष्ट चुलिएपछि शनिबारको बैठकले कारवाही गर्ने निर्णय लिएको हो । योसँगै सबै तहलाई परिपत्र गर्ने तयारी भइरहेको जसपा कार्यालयले जनाएको छ ।

अध्यक्ष यादव मंसिर ४ को आमनिर्वाचनमा हारेर संघीय सांसदमा आउन बाटो बन्द भएपछि वैशाख १० मा भएको उपनिर्वाचनमा बारा २ बाट निर्वाचित भएका छन् । निर्वाचितपछि यादवलाई पार्टीले संसदीय दलका नेता चयन समेत गरिसकेको छ ।