आलु र प्याजमा भ्याट नहटाउने अर्थमन्त्रीको संकेत

२९ जेठ, काठमाडौं । सरकारले आगामी आर्थिक वर्षको बजेट वक्तव्यमार्फत आलु र प्याजमा भ्याट लगाउने नीतिगत व्यवस्था कायमै रहने संकेत दिएको छ ।

सोमबार प्रतिनिधिसभाको बैठकमा यसअघिका छलफलमा सत्ता पक्ष र प्रतिपक्षी सांसदहरुले उठाएका प्रश्न र सुझावमाथि जवाफ दिँदै अर्थमन्त्री डा. प्रकाशशरण महतले दैनिक उपभोग्य वस्तुमा आत्मनिर्भरता कायम गराउने सरकारको समाजवाद उन्मुख विकास कार्यक्रम अन्तर्गत उत्पादनको बेस बढाउन भ्याटको नीति लिएको बताए ।

बैठकमा भएको छलफलका क्रममा सांसदहरुले उठाएका प्रश्नको जवाफमा मन्त्री महतले करको दर बढाएर मात्रै आत्मनिर्भरताको मान्यता सार्थक नहुने भन्दै मन्त्री डा. महतले करको बेस (शीर्षक) बढाउने नीति गठबन्धन सरकारले लिएको स्पष्ट पारे । 

नागरिकको चुलोमा हरेक दिनजसो पाक्ने आलु र प्याज सधैं विदेशमा ल्याउने कुरा ठीक नहुन भन्दै देशिभत्रै उत्पादनमा प्रोत्साहन गर्न आयात हुने आलु र प्याजमा भ्याट लगाएर बेस बढाउने नीतिलाई कार्यान्वयमा लैजान खोजिएको उनले बताए । कृषि उपज उत्पादनमा बजेटमा अनुृदानको व्यवस्था गरिएको आलु र प्याज विदेशमा किन्नुपर्ने अवस्थालाई विस्थापित गर्ने नीति सरकारले लिएको प्रष्ट पारे ।

सोमबार मात्र आलु र प्याज आयात गर्दै आएका व्यवसायीहरुले काठमाडौंमा पत्रकार सम्मेलन गर्दै आलु र प्याज आयातमा लगाएको भ्याटले उपभोक्ता मूल्य महंगी हुने बताउँदै भ्याट हटाउन माग गरेका छन् । उनीहरुको पत्रकार सम्मेलन सकेलगत्तै आएको जवाफमा मन्त्री महतले भ्याट नहट्ने संकेत दिएका हुन् ।