नेपाली उत्पादन र उद्योगीलाई संरक्षण गर्न आयातित उपभोग्य वस्तुमा कर लगाएको होः अर्थमन्त्री

२९ जेठ, काठमाडौं । अर्थमन्त्री प्रकाशशरण महतले बजेटमार्फत उपभोग्य वस्तुमा कर लगाएर उपभोक्तालाई महँगीको मार परेको भनेर भइरहेको आलोचनाको बचाउ गरेका छन् । उनले आन्तरिक उत्पादकलाई संरक्षण गर्नका लागि विदेशबाट आयातित उपभोग्य वस्तुमा कर लगाएको बताए । 

प्रतिनिधिसभाको सोमबारको बैठकमा अर्थमन्त्री महतले सांसदका प्रश्नको जवाफ दिने क्रममा विदेशबाट आयातित उपभोग्य वस्तुमा कर लगाउँदा आन्तरिक उत्पादकलाई फाइदा हुने बताए । उनले आयातित वस्तुमा कर लगाउनु आन्तरिक उद्योगीलाई संरक्षण गरिएको बताए ।

बजेटमार्फत उपभोग्य वस्तुमा कर लगाएर उपभोक्तालाई महँगीको मारमा पार्ने नीति बजेटमार्फत लिइएको सांसदहरूको भनाइ थियो । सांसदहरूले त्यसरी प्रश्न उठाउनु स्वाभाविक भएको मन्त्री महतको भनाइ थियो । उनले उपभोक्ता मारमा पर्ने, उत्पादक समस्या पर्ने नीति नलिइएको बताए ।

मन्त्री महतले बजेटमा नारामात्रै नभएको बताए । हरेक नाराहरू बजेट विनियोजन, सरकारको नीति तथा कार्यक्रममा लक्षित उद्देश्यका साथ आएको बताए । अनावश्यक क्षेत्रमा विनियोजन गरेको बजेट कटौती गरिएको उनको भनाइ थियो । करको दर मात्रै नभई दायरा पनि बढाउँदै आएको उनको भनाइ थियो ।