रामेछाप कांग्रेस सभापति तामाङविरुद्ध देउवासमक्ष उजुरी

३० जेठ, काठमाडौं । नेपाली कांग्रेस रामेछाप सभापति पूर्णबहादुर तामाङविरुद्ध केन्द्रीय सभापति शेरबहादुरसमक्ष उजुरी परेको छ । तामाङको कार्यशैलीको विरोध गर्दै   कांग्रेस रामेछापका पूर्वसभापति रामचन्द्र खड्काको नेतृत्वमा ४७ जनाले सभापति देउवालाई उजुरी पत्र बुझाएका छन् । उजुरी दिनेमध्येमा ७ जना महाधिवेशन प्रतिनिधि छन् । 

कांग्रेसले जिल्ला सम्मेलन घोषणा गरिसकेको छ । उसले जिल्लाका ६४ वटै वडामा सम्मेलन सम्पन्न गरिसकेको छ । तामाङविरुद्ध स्थानीय र आमनिर्वाचनका बेला चरम असन्तुष्ट प्रकट भएको थियो । खडका पक्षले तामाङले बोलाएको जिल्ला समितिको बैठक समेत बहिष्कार गरिसकेको अवस्था छ । 

तामाङले जिल्ला सम्मेलनका लागि जिल्ला कार्यसमिति सदस्यलाई मात्र बोलाइएको छ । जिल्लाका संस्थापन इतर पक्षका महाधिवेशन प्रतिनिधिलाई बोलाएका छैनन् । जिल्ला सम्मेलनमा पक्षपात गरिएको भन्दै आफूहरुले केन्द्रमा सभापतिलाई जानकारीका लागि उजुरी दिएको असन्तुष्ट पक्षका नेता एवं महाधिवेशन प्रतिनिधि भरत चौलागाँईले बताए  ।

सभापति तामाङले जिल्ला पार्टीलाई विधि र विधानभन्दा बाहिर गएर मनोमानी तरिकाले संचालन तथा निर्णय गर्ने र जिल्ला पार्टीमा गुट संचालन गर्ने गरेको आरोप छ ।