सत्तारूढ दलहरूबीच समझदारी कायम गरेर बजेट पारित गर्ने गठबन्धनको सहमति

३० जेठ, काठमाडौं । सत्तारुढ दलहरुको गठबन्धन बैठकले बजेटप्रति भइरहेको असमझ्दारीलाई उचित तवरले हटाएर बजेट पारित गर्ने सहमति भएको छ । 

प्रधानमन्त्रीको सरकारी निवास बालुवाटारमा मंगलबार बिहान बसेको बैठकमा दलहरुबीच बजेटमाथि देखिएको असन्तुष्टिलाई समाधान गर्ने सहमति बनेको जसपा नेता राजेन्द्र श्रेष्ठले बताए ।

बैठकमा बजेटसहित अहिले पछिल्ला समसामयिक राजनीतिक गतिविधिबारे छलफल भएको र असमझ्दारीलाई उचित तवरले सम्बोधन गरेर अगाडि बढ्ने दलका नेताहरुबीच सहमति बनेको उनले बताए । 
बैठकमा बजेटमा नेकपा (एकीकृत समाजवादी) अध्यक्ष माधव नेपालसहितका नेताहरूले राखेको असन्तुष्टिलाई पनि प्रधानमन्त्रीले सम्बोधन गरेर अघि बढ्ने भएको बताए । बैठकमा नेपालले आफ्नो पार्टीभित्र सरकारको कामकारवाही र बजेटलाई लिएर असन्तुष्ट चुलिएको कुरा राखेका थिए । 

मसख्यगरी बजेटलाई लिएर एकीकृत समाजवादीका सांसदहरुले संसद बैठकमा बजेटमाथिको छलफलमा चरम असन्तुष्ट जनाउँदै सरकार छाड्नु परेपनि यथास्थितिमा बजेट पारित गर्न साथ दिन नसकिने चेतावनी दिएका थिए । सत्तारुढ दल जसपा र आजपाले पनि बजेट विभेदकारी भएको भन्दै विरोध गरेको छ । 

यसबाट प्रमुख प्रतिपक्षी एमाले र प्रतिपक्षी दलहरु रास्वपा, राप्रपा सरकार ढाल्नबारे चलेखेलमा लागेको चर्चा भइरहेको अवस्थाबीच प्रधानमन्त्री प्रचण्डले गठबन्धनको बैठक बोलाएका थिए ।