प्रचण्ड-बाबुरामविरुद्धको रिट निवेदनमा कारण देखाउ आदेश

३० जेठ, काठमाडौं । प्रधानमन्त्री पुष्पकमल दाहाल  ‘प्रचण्ड’ र पूर्वप्रधानमन्त्री बाबुराम भट्टराईविरुद्ध परेको रिटमा सर्वौच्च अदालतले विपक्षीका नाममा कारण देखाउ आदेश जारी गरेको छ ।

न्यायाधीश सपना प्रधान मल्लको एकल इजलासमा मंगलबार भएको प्रारम्भिक सुनुवाइपछि रिट निवेदकले माग गरेबमोजिम अन्तरिम आदेश दिन नपर्ने भए आधार र प्रमाणसहित कारण पेश गर्न प्रचण्ड र बाबुरामको नाममा आदेश दिएको हो । रिटलाई रिटलाई अग्राधिकार दिने आदेश समेत भएको छ ।

तत्कालीन माओवादीका बाल सैनिक काभ्रेका लेनिन विष्टसमेतले युद्ध अपराधमा कारबाहीको माग गर्दै प्रचण्ड र बाबुराम भट्टराईविरुद्ध जेठ २८ गते रिट दर्ता गराएका थिए । 

उनीहरुले आफूहरुलाई बालक उमेरमा युद्धमा हिँडाएर जोखिमयुक्त तवरले युद्धका सामान बोक्न, शत्रु पक्षको सूचना लिन तथा युद्ध सामागी ढुवानीका काममा लगाएर बाल अधिकारको उल्लंघन गरेको कसुरमा कारवाही हुनुपर्ने र न्याय र क्षतिपूर्ति पाउनुपर्ने मागदाबी गरेका छन् । तत्कालीन सामन्ती राजतन्त्र विस्थापित गराउन २०५२ फागुन १ गतेदेखि १० वर्षसम्म माओवादीले सशस्त्र संघर्ष (जनयुद्ध) चलाएको थियो ।

साे जनयुद्धमा राज्य र विद्राेही पक्षबाट करिब १७ हजार नागरिकले ज्यान गुमाएका थिए ।