काठमाडौं महानगर र अखिल क्रान्तिकारीबीच टक्कर, क्रान्तिकारीले लगाएको ताला नगरप्रहरीले तोड्यो

३० जेठ, काठमाडौं । काठमाडौं महानगरपालिकाले विद्यार्थी संगठन अखिल क्रान्तिकारीले विद्यालयमा लगाएको ताला तोडिदिएको छ । माओवादी केन्द्रनिकट अखिल क्रान्तिकारीले महानगरभित्रका विभिन्न विद्यालयमा लगाएको मंगलबार नगर प्रहरी बलले तोडेका हुन् । 

नक्सालस्थित ग्यालेक्सी स्कुल, स्वयम्भुस्थित संस्कृत स्कुल, मालीगाउँस्थित वृहस्पति विद्या सदन र बुढानिलकण्ठस्थित भ्याली पब्लिक स्कुल, काष्ठमण्डप स्कूलमा लगाएको ताला हम्मर र ग्रेण्डरको सहायताले तोडेका छन् । 

विद्यालयले शैक्षिक गुणस्तर कायम नराखेको, अभिभावकसँग चर्को शुल्क असुलेको, पोशाकमा कमिशन खाएको जस्ता आरोपमा तालाबन्दी गरिएको थियो । ताला तोडिएपछि महानगरका मेयर बालेन साहले आफू शैक्षिक गुणस्तर कायम गराउन र चर्को शुल्क लिनबाट रोक लगाउन क्रियाशील रहेको भन्दै विद्यालयमाथि गुनासो भए महामनगरसामू राख्न संगठनहरुलाई आग्रह गरेका छन् । 

तालाबन्दी गरेर समस्या समाधान नहुने भन्दै जारी तालाबन्दी फोडेर विद्यालयमा पठनपाठन सुचारु गरिएको उनले बताए । यसअघिदेखि नै उनले शैक्षिक संस्थाभित्र राजनीतिक कार्यक्रम चलाउन नपाइने र तालाबन्दी गर्न नदिने बताउँदै आएका छन् ।