लोकसेवाको परीक्षाका नक्कली परीक्षार्थी र नक्कली खडा गर्ने परीक्षार्थी २ वर्षपछि पक्राउ

३१ जेठ, काठमाडौं । रुपन्देहीमा लोकसेवाको परीक्षामा दुई जना नक्कली परीक्षार्थी पक्राउ परेका छन् । उनीहरुलाई अर्काको नाममा परीक्षा दिइरहेको अवस्थामा फेला पारी पक्राउ गरिएको रुपेन्देही प्रहरीले जनाएको छ । 

पक्राउ पर्नेमा सप्तरीको राजबिराज–११ का ३३ वर्षीय मनोजकुमार शर्मा सुतिहार र सोही ठाउँका ३० वर्षीय नारायण यादव रहेका छन् । शर्मा कोष तथा लेखा नियन्त्रण कार्यालय कपिलवस्तुको सह लेखापाल र यादव जिल्ला हुलाक कार्यालय सप्तरीमा नायब सुब्बा पदमा कार्यरत रहेको पाइएको छ । 

लोकसेवा आयोगले बुटवल केन्द्रमा खरिदार मधेशी पदका लागि २०७७ साल फागुन २९ गते प्रथम र २०७८ साउन ४ गते लिएको परीक्षामा मनोजकुमार शर्मा सुतिहारको नाममा नारायण यादवले परीक्षा दिएको पाइएपछि लिखित कीर्ते सम्बन्धी कसूर मुद्दामा दुवै जनालाई पक्राउ गरिएको जिल्ला प्रहरी कार्यालय रुपन्देहीका प्रवक्ता श्यामु अर्यालले बताए ।

परीक्षामा अर्काको नामबाट परीक्षा दिने नक्कली र नक्कली खडा गराई परीक्षा दिन लगाउने काम गरेर कीर्ते र बेइमानी गरेको कसुरमा अनुसन्धान भइरहेको जनाइएको छ ।