१८ वर्ष पुगेका नागरिकलाई सैन्य तालिमको व्यवस्था सांसद सुवालको सुझाव

३२ जेठ, काठमाडौं । संसद बैठकमा युवा पंक्तिलाई सैन्य तालिममा समावेश गराउनुपर्ने आवाज उठेको छ । सांसद प्रेम सुवालले मन्त्रालयहरुको खर्च कटौतीसम्बन्धी विधेयकमा धारणा राख्दै सांसद सुवालले १८ वर्ष पूरा भएका नागरिकलाई सैन्य तालिम दिनुपर्ने बताए । तालिमका लागि आउँदो आर्थिक वर्षको बजेटमा रकम विनियिोजन गर्न सुझाव दिए । 

तालिमको अभावमा अनुशासनविहीन बन्दै गएको र देशकै माया गर्ने विषयलाई बिर्सिएको पाइएको उनले बताए । तालिमको व्यवस्थाले युवा उमेरदेखि नै अनुशासित बन्ने र देशको माया गर्ने सैन्यभाव पलाउने बताए । देशभित्र व्यापक राजगार सिर्जना गर्ने कार्यक्रम व्यापक रूपमा अगाडि बढाउने किसिमका कार्यक्रम ल्याउन सरकारलाइ सुझाव दिए । देशभित्रकाे राेजगारले युवामा राष्ट्रियताकाे पक्षमा लड्ने भावना विकसित हुने उनकाे भनाइ छ ।

‘अहिले झण्डै ८० लाख युवा (युवकयुवती)हरु विदेशमा रहेको र देशभक्तिभाव अभावका कारण देश फर्किने संभावना न्यून रहेको छ’ सुवालले भने, ‘सैन्य तालिम दिन सकेमा उनीहरु कोही पनि विदेशमा पुगेपनि काम गरेपछि वा कामको महत्व बुझेर देश विकासका लागि फिर्ता आउनेछन् ।’

तालिमले स्वास्थ्यलाई समेत स्वच्छ बनाउने र कुलतमा लाग्नेको सख्ंयामा पनि न्युन आउने विश्वास व्यक्त गरे ।

सरकारले बजेटमा चुरेका ढुंगा–गिट्टी उत्खनन गर्ने भनेर उल्लेख गरेको भन्दै आपत्ति जनाए । चुरे उत्खनन नभई संरक्षण गर्ने गरी बजेटमा चुरे संरक्षण गर्ने रकम छुट्याउन सुझाव दिए । चुरे दोहन गर्ने नीति सरकारले कायम राखे प्रतिवाद गर्ने बताए ।