बजेट प्रियतावादी र केही क्षेत्रमा सीमित छ, भनिरहनु पर्दैन : सांसद केसी

३२ जेठ, काठमाडौं । नेपाली कांग्रेसका सांसद अर्जुननर सिंह केसीले सरकारले आगामी आर्थिक वर्षका लागि ल्याएको बजेट प्रियतावादी र केही क्षेत्रमा सीमित रहेको बताएका छन् ।

बिहीबार प्रतिनिधिसभाको बैठकमा विनियोजन विधेयकमाथि धारणा राख्दै सांसद केसीले बजेटले युवा पक्तिको चाहना सम्बोधन र आत्मनिर्भरताका लागि उत्पादन बढाउन ठोस नीति ल्याउन नसकेको बताए । 

आफ्नो क्षेत्र नुवाकोटमा राम्रै बजेट परेको स्वीकार्दै त्यसैलाई केन्द्र बनाएर बहस र आलोचना गर्नु उचित नभएको बताए । बैठकमा अधिकांश सांसदहरुले अर्थमन्त्री डा. प्रकाशशरण महतको समेत निर्वाचन क्षेत्र रहेको नुवाकोट, प्रधानमन्त्री प्रचण्डको निर्वाचन क्षेत्र रहेको गोरखा र नेपाली कांग्रेसका सभापति शेरबहादुर देउवाको निर्वाचन क्षेत्र डडेल्धुरामा भौतिक पूर्वाधार मन्त्रालयका लागि छुट्याइएको बजेटमध्ये ५१ प्रतिशत खन्याएको भन्दै आलोचना गर्दै आएका छन् । 

सांसद केसीले खेलकुद क्षेत्रका निकायहरुमा राजनीतिक दलहरुले कार्यकर्ता भर्ती केन्द्रको रुपमा बुझेर चलाउँदा नेपालको खेलकुद क्षेत्र धराशयी बनेको बताए । शिक्षा क्षेत्रमा पनि सरकारले सही ढंगले नीति कार्यान्वयन गराउन नसकेको बताए । ‘सरकारले दुई किसिमका नागरिक उत्पादन गर्ने काम गरिरहेको छ’ उनले भने, ‘शैक्षिक क्षेत्रलाई सरकार २ थरि जनशक्ति उत्पादन गर्ने फ्याक्ट्री बनाउने नीतिले छिट्टै नै राष्ट्रिय दूरावस्था देखिनेलावा छ ।’

साथै, सरकारको वनसम्बन्धी नीति त्रुटिपूर्ण रहेको भन्दै बस्तीमा पहिरो खस्ने, बस्तीमुनि पहिरो चल्ने अवस्था बढेको केसीले बताए । प्लाष्टिकको झोला प्रयोग हटाउन मात्र सकेपनि भूक्षयमा कमी आउने उनको भनाइ छ । 

रोजगार र सुरक्षा अभावमा युवा पंक्ति विदेश पलायन हुन क्रम नरोकिएको उनले बताए । राष्ट्रिय सुरक्षा र सामाजिक आयको प्रत्याभूति नभएसम्म युवा पंक्ति देशभित्र अडिने अवस्था नदेखिएको बताए । भोको पेटले धर्म, संस्कृति वा अनुशासन केही पनि नबुझ्ने अवस्थामा युवालाई सरकारले नै पुर्याउने डरलाग्दो परिस्थिति स्र्जिना गराइरहेको बताए ।

‘बच्चालाई सबै बढी माया गर्ने आमाले नै हो’ सांसद केसीले भने, ‘तर आफैंले जन्माएको बच्चालाई बाँच्नकै निम्ति अरुले लगेर पालोस् भन्ने परिस्थितिमा आमालाई पुर्याउने काम अहिले पनि देखिन्छ । केही खान नपाएपछि सर्पले आफ्नै अण्डालाई खाएको घटना हाम्रा लागि भरपर्दो दृष्टान्त बन्नुपर्छ ।

उनले बजेट समयसुहाउँदो नरहेपनि सरकार पक्षका सांसद भएकाले बजेटको समर्थन गर्नुपर्ने बाध्यतामा आफू रहेको कुरा बुझिदिन पनि विपक्षी दलका सांसदहरुसँग आग्रह गरे ।