संसद बैठकमा प्रदीप पौडेलको प्रस्तावः ‘युवा विकास बैंक स्थापना गरौं’

३२ जेठ, काठमडौं । नेपाली कांग्रेसका सांसद प्रदीप पौडेलले युवा विकास बैंक स्थापना गर्न प्रस्ताप गरेका छन् । बिहीबार प्रतिनिधिसभाको बैठकमा विनियोजन विधेयकमाथि छलफलमा भाग लिँदै सांसद पौडेलले मुलुकको सिंगो युवा पंक्तिलाई शिक्षित र रोजगारी बनाउने दायित्व सरकारको रहेको बताउँदै यो विषय बजेटमा छुटेको बताए । 

उनले रोजगार सरकारले नभई बजार दिने भएकाले कक्षा १२ उत्तीर्ण गरेको युवा शक्तिलाई उत्पादन र आविष्कारको क्षेत्रमा रोजगारी बनाएर लैजाने नीति प्रस्तुत बजेटमा गरिनुपर्ने बताए । ‘शल्यक्रिया गर्ने चिकित्सकलाई रेडियो, घडी बनाउने ज्ञान नहुन सक्छ, तर शल्यक्रियाबारे थाहै नभएका टेक्निसियनले त्यो बनाउन सक्छन्’ उनले भने, ‘हरेक नागरिकलाई ज्ञान र सीपयुक्त बनाउन कानून बनाउनतिर हामी सांसदहरु लागौं ।’

उनले रोजगारको अभावमा दैनिक हजारौं युवक युवती विदेश गइरहेको भन्दै यसलाई रोक्न उत्पादन बढाउने र प्राविधिक ज्ञानसम्बन्धी कक्षा संचालनका लागि नीति बनाउन सबै सांसदहरुले भूमिका खेल्नुपर्ने बताए । रोजगारको आशामा विदेश पुगेका नागरिक दैनिक चारदेखि ६ जनाको मृत शरीर आइरहेको भन्दै यसलाई रोक्नेबारे बजेट नआएको बताए ।

उनले युवा विकास बैंक स्थापना गर्न सकेमा वैदेशिक रोजगारमा गएका श्रमिकले उक्त बैंकमा खाता खोलेर रकम जम्मा गर्न सकिने अवस्था आउने बताए । रोजगारबाट देश फिर्ता भएपछि तिनलाई उनले जम्मा गरेका रकममा उत्तिनै रकम थपिदिएर उद्यम वा व्यवसाय संचालन गर्न दिन सकिने बताए । उद्यम र व्यवसायबाट सरकारलाई राजश्व संकलनमा वृद्धि हुने बताए ।

उनले लि क्वानले मलेसियामा माछा मार्ने काममा रहेका सिंगापुरका नागरिकलाई फिर्ता बोलाएर दोब्बर तलब दिई निर्माण क्षेत्रको तीव्र रुपमा विकास गरेकै कारण आजको विकसित सिंगापुर बनेको बताए । युवालाई बाँच्ने अधिकारसाथ रोजगारको ग्यारेन्टी गर्ने दायित्व कानून बनाउने तहमा बस्ने सबैको रहेको बताए ।

यस्तै, पौडेलले वन नीतिमा व्यापक सुधार गर्नुपर्ने बताए । कानूनको अभावमा वनभित्र हजारौं टन काठ कुहिएको तर विदेशबाट वार्षिक १८ अर्ब रुपैयाँको काठ आयात गर्ने गरिएको बिडम्बनापूर्ण अवस्था रहेको बताए । जंगलमा खेर गइरहेको काठ प्रयोग गर्न कानूनले रोक लगाउँदा काठ तस्करी बढेको र धेरै नागरिक जेलमा पुगेको बताए । 

उनले रुख काटेको स्थान बिरुवा रोप्ने र रुखको गणना तथा अनुगमनमा डिजिटल प्रविधिको प्रयोगको व्यवस्था गर्न सुझाव दिए । एक ठाउँमा बसेर स्याटेलाइटबाट सिंगो वनभित्र रहेको रुखको तस्वीर लिने र कटान गर्नुपर्ने रुखको संख्या निकाल्न सकिने बताए । रुख काटेपछि त्यस ठाउँमा बिरुवा रोपियो कि रोपिएन भन्ने विषय तत्काल पत्ता लगाउन सकिने बताए । यसबाट काठ तस्करी राेक्न सकिने बताए ।

अर्को प्रसंगमा सामाजिक सुरक्षा भत्ताको प्रावधानमा सुधार गर्नुपर्ने बताए । सामाजिक सुरक्षा भत्ता समानताको आधारमा नभई समताको आधारमा दिइने व्यवस्था गरिनुपर्ने बताए । कतिपय अवस्थाका नागरिकलाई भत्ता नै आवश्यक नपर्ने रहेको उनको भनाइ छ । रकारले ल्याउने भनिएको मुर्रा राँगा रोजगार वृद्धि र कृषि विकासमा उचाइ हासिल गर्ने विषयसँग सम्बन्धित रहेको उनले बताए । राँगा वास्तवमा कृषि क्षेत्रलाई उकास्ने विषय भएपनि बुझाउन नसक्दा संसदमा ब्यंग्य गर्ने विषय बनाइएको बताए ।