प्रस्तावित प्रधानन्यायाधीश कार्की र समितिका सदस्यबीच सवाल जवाफ, न्यायालय सुधारको के छ योजना ?

१ असार, काठमाडौं । प्रस्तावित प्रधानन्यायाधीश हरिकृष्ण कार्कीमाथि संसदीय सुनुवाइमा सांसदहरुले  न्यायालय सुधारबारे प्रश्न गरेका छन् । कार्कीलाई समिति सदस्य पदम गिरीले न्याय क्षेत्रको सबै समस्या थाहा छ भन्दै पहिलो प्रश्न गरेका थिए । 

उच्चस्तरीय न्यायालय समिति तपाईको नेतृत्वमा बन्यो । तपाई कामु हुँदा ८ महिनामा  समितिको सुझावमा कति काम गर्नुभयो ? प्रधानन्यायाधीश बनेपछि न्यायालय सुधार गर्ने के संकल्प छ ? भन्दै प्रश्न गरेका छन् ।

संसदीय सुनुवाइ समितिको बैठकमा प्रस्तावित प्रधानन्यायाधीश हरिकृष्ण कार्कीसँग प्रश्नोत्तर सुरु भएसँगै  समितिमा कार्कीविरुद्ध परेका उजुरी र उनले बिहीबारको बैठकमा पेस गरेको कार्य योजनाका विषयमा प्रश्न सोध्ने क्रम जारी छ ।

प्रश्न सोध्ने क्रम सकिएपछि कार्कीले जवाफ दिने छन् । संसदीय समितिले उनको नाम अनुमोदन गरे हाल कायम मुकायम प्रधानन्यायाधीश रहेका कार्की प्रधानन्यायाधीश नियुक्त हुनेछन् ।

संवैधानिक परिषदबाट भएको सिफारिसलाई संसदीय सुनुवाइ समितिले अनुमोदन गरेपछि राष्ट्रपतिबाट नियुक्त हुने संवैधानिक व्यवस्था छ । कार्कीलाई प्रधानन्यायाधीश नियुक्त गर्न गत वैशाख २५ गते संवैधानिक परिषदको बैठकले सिफारिस गरेको थियो ।