चीनमा ४ महिना लामाे उपचारपिछ फर्किए माओवादी केन्द्रका नेता पुन

१ असार, काठमाडौं । चार महिना दिनदेखि चीनमा उपचार गराइरहेका नेकपा (माओवादी केन्द्र)का उपमहासचिव एवं पूर्वअर्थमन्त्री वर्षमान पुन ‘अनन्त’ स्वास्थ्योपचार गरी स्वदेश फर्किएका छन् । पुन चिनियाँ सहर छेन्दुबाट एयर चाइनाको नियमित उडानमार्फत् आज बिहान नेपाल फिर्ता भएका हुन् ।

पुनको उपचारका क्रममा साथमा रहेकी उनकी पत्नी पूर्वसभामुख ओनसरी घर्ती पनि स्वदेश फर्किएका छन् ।  पुनलाई स्वागत गर्न माओवादी केन्द्रका वरिष्ठ नेता एवं उपप्रधान र गृहमन्त्री नारायणकाजी श्रेष्ठ, नेताहरु झक्कु सुवेदी, जयपुरी घर्ती,दुर्गा चापागाईंलगायत त्रिभुवन अन्तर्राष्ट्रिय विमानस्थल पुगेका थिए ।

पूर्वमन्त्री पुन जटिल प्रकारको वंशाणुगत जन्डिस बल्झिएपछि उपचारका लागि गत चैत १ गते चीन गएका थिए । उनको चीनको सेनजेनस्थित थर्ड पिपुल्स अस्पतालमा उपचार भएको हो । उनको शरीरमा जन्डिसको मात्रा (बिलरुबिन) ४० बाट घटेर १.५ बिन्दुमा झरेको छ । चिकित्सकका अनुसार सामान्य मानिसमा बिलरुबिनको मात्रा १.५ देखि ८ बिन्दुसम्म हुन्छ । 

यसअघि नेता पुन २०७८ साल असोज १३ गते बैंकक पुगेर उपचार गराएका थिए । त्यसपछि चीनको सेनजेनमा उपचार हुँदै आएको छ ।