जिप दुर्घटनामा चालकको मृत्यु, ६ जना घाइते

१ असार, दाङ । दाङको तुलसीपुर– ३ शिरखोलामा भएको जिप दुर्घटनामा चालकको मृत्यु भएको छ । तुलसीपुरदेखि रोल्पा गंगादेव गाउँपालिका– १ ओतका लागि छुटेको जिप दुर्घटना हुँदा चालक गंगादेव– १ निवासी अन्दाजी ३२ वर्षीय विष्णु पुनको मृत्यु भएको प्रहरीले जनाएको छ । 

दुर्घटनामा गम्भीर घाइते भएका उनको तुलसीपुरस्थित राप्ती प्रादेशिक अस्पतालमा मृत्यु भएको हो । गाडीमा सवार १० जनामध्ये ६ जना गम्भीर घाइते भएका छन् । गम्भीर घाइतेमध्ये चारजनालाई थप उपचारका लागि बाँकेको कोहलपुर रेफर गरिएको छ । अन्यको प्रादेशिक अस्पताल तुलसीपुरमा उपचार भइरहेको छ ।

रा.१ ज ५५६ नम्बरको यात्रुवाहक जिप सडकदेखि ६० मिटर तल खसेको थियो । शुक्रबार बिहान साढे १० बजेतिर दुर्घटना भएको हो । तीव्र गतिका कारण दुर्घटना भएको हुन सक्ने प्रहरीले अनुगमान गरेको छ ।