हिसान शैक्षिक मेलाबारे संसद कुरा उठ्यो, काठमाडौं महानगरले यथास्थितिमा मेला गर्न नदिने

१ असार, काठमाडौं । उच्च माध्यमिक विद्यालय (हिसान)को आयोजनामा भृकुटीमण्डपमा बिहीबार सुरु भएको ‘शैक्षिक मेला २०८०’ स्थगनबारे प्रतिनिधिसभाको बैठकमा कुरा उठेको छ ।

एमालेका सांसद एवं सचेतक महेश बर्तौलाले शिक्षा मन्त्रालयको स्वीकृतिमा शुरु भएको मेला काठमाडौं महागरपालिकाले बन्द गराएको भन्दै विरोध गरेका छन् । मेला हेर्न आएका विद्यार्थीहरु अन्यौलमा परेको उनले बताए । उनले आजबाट मेला सुरु भएको भने । लगत्तै रास्वपाका सांसद मनिष झाले मेला बिहीबारबाटै बन्द गरिएको र स्थानीय तहको अधिकारभित्रै रहेर काठमाडौं महानगरले बन्द गराएको बताए । यसपछि मेलबारे दोहोरी अन्त भयो । मेलाको उद्घाटन शुक्रबार सभामुख देवराज घिमिरेले गरेका थिए ।

महानगरले महानगरको निर्देशनको उल्लंघन गरेको भन्दै महागर प्रहरी राजुनाथ पाण्डेको नेतृत्वमा गएको टोलीले बिहीबार दिउँसोबाट बन्द गराएको थियो । मेला स्थलमा महानगर प्रहरी तैनाथ छन् । प्रमुख पाण्डेले तत्कालको अवस्थामा मेला सञ्चालन गर्न नदिन भन्ने आदेश रहेको बताए । 

मेलाका विषयमा महानगरको शिक्षा विभाग र हिसान प्रतिनिधिबीच छलफल भइरहेको जनाइएको छ । मेलामा विभिन्न स्टल स्थापना गरी विद्यालयहरुले कक्षा ११ र स्नातक तहमा भर्नाका लागि फाराम र र शुल्क शीर्षक वितरण गरेको पाइएपछि मेला बन्द गराएको महानगरको भनाइ छ । 

महानगरको शिक्षा विभागले यसअघि नै महानगरभित्र संचालित विद्यालयहरुलाई परिपत्र गरेर एसईई परीक्षाको रिजल्ट आउनुअघि कक्षा ११ को भर्नासम्बन्धी कुनैपनि प्रक्रिया र गतिविधि नगर्न निर्देशन गरेको थियो । एसईईको नतिजा आइसकेको छैन । असारको दोस्रो हप्तातिर आउने ठानिएको छ । नतिजा नआउँदै निजी क्षेत्रका माविहरुले लाखौं रुपैयाँ खर्च मेलामा खर्च गर्ने र उक्त खर्च विद्यार्थीबाट उठाउँदै आइरहेका छन् ।

महानगरले महानगरभित्र शिक्षण संस्थामा संचालन हुने विभिन्न तहका परीक्षाका बेला शैक्षिक परामर्शदाताहरुलाई पर्चा बाँड्न र विज्ञानसम्बन्धी पम्लेट, पोष्टर वितरणमा पनि रोक लगाउँदै आएको छ ।