वाग्मती सरकारले ल्यायो ६२ अर्ब ७० करोडको बजेट (पूर्णपाठ)

१ असार, काठमाडौं । वाग्मती प्रदेशले आगामी आर्थिक वर्ष २०८०/०८१ का लागि ६२ अर्ब ७० करोड ९० लाख रुपैयाँको बजेट ल्याएको छ । शुक्रबार वाग्मती प्रदेशका आर्थिक मामिला तथा योजनामन्त्री बहादुरसिंह लामाले आगामी आर्थिक वर्षका नीति तथा कार्यक्रम कार्यान्वयनका लागि उक्त बजेट सार्वजनिक गरेका हुन् ।
 
कुल विनियोजनमध्ये चालुतर्फ २६ अर्ब ७० करोड २७ लाख, पुँजीगततर्फ ३५ अर्ब ५० करोड ६३ लाख र वित्तीय व्यवस्थापनतर्फ ५० करोड विनियोजन गरिएको छ । वाग्मती प्रदेशले प्रदेश विकास बैंक स्थापनाका लागि अध्ययन गर्न आवश्यक बजेट छुट्याएको छ ।

आगामी आर्थिक वर्षको खर्च व्यहोर्ने स्रोतमध्ये कर राजस्वबाट २५ अर्ब १७ करोड २६ लाख रुपेयाँ, अन्य राजस्वबाट पाँच अर्ब २६ करोड ९४ लाख, संघीय वित्तीय हस्तान्तरणबाट १७ अर्ब ८१ करोड २३ लाख, चालु आर्थिक वर्षको अनुमानित सञ्चित कोषको बचत र अन्य प्राप्तिबाट १४ अर्ब ४५ करोड ४७ लाख व्यहोरिनेछ ।