मैले अरुमाथि लगाएका आरोप सत्य छन, मुकाविला गर्न तयार छुः ओली

२ असार, काठमाडौं । नेकपा एमालेका अध्यक्ष केपी शर्मा ओलीले आफूले कसैलाई विना आधार आरोप नलगाएको बताएका छन् । उनले आफूले लगाएका आरोप सत्यमा आधारित भएकाले आरोप मिथ्या हो भनेर आउने सबैसँग मुकाविला गर्न तयार रहेको बताएका छ । 

शनिबार पार्टी केन्द्रीय कार्यालय च्यासलमा आयोजित विभिन्न पार्टी परित्याग गरी एमालेमा प्रवेश गरेका नेता-कार्यकर्ताहरूलाई पार्टी प्रवेश गराउँदै उनले समाजवादी मोर्चा बनाउने कुरा एमालेसँग मुकाबिला गर्न र कांग्रेसलाई तर्साउन मात्रै भएकाले डराउनु आवश्यक नरहेको बताए । 

अध्यक्ष ओलीले सँगै काम गरेका नेताहरूलाई आफूले राम्रोसँग चिनेकाले कुनै नयाँ कुरा नरहेको जिकिर गरे । उनले आफ्नो ५८ वर्षे राजनीतिक जीवनमा कुनै र कसैप्रति पनि झुटो आरोप नलगाएको र तथ्यमा आधारित आरोपमात्रै आफूले लगाउने गरेको दाबी गर्दै आफूले लगाएका हरेक आरोपको जवाफ दिन आफू तयार रहेको बताए ।

समाजवादी मोर्चा बनाउने नेकपा (माओवादी केन्द्र), नेकपा (एकीकृत समाजवादी) लगायत पार्टीहरूको निर्णयप्रति इंगित गर्दै फरक उद्देश्य भएका तत्वहरू एक ठाउँमा जम्मा भएर राष्ट्रिय शक्ति निर्माण नहुने टिप्पणी गरे ।

ओलीले भने, ‘राजनीति गरेको, ५८ वर्षको जीवनमा मैले बोलेका कुरा कुनै झुटमा आधारित छैनन् । म हरेक कुराको जवाफ दिन तयार छु । हामीले विपक्षीमाथि, अरू पार्टीमाथि लगाएका आरोप गलत छैनन् । सही आरोप लगाएका छौँ । सही आरोप लगाउँदा उहाँहरूलाई रिस उठ्छ । अब गठबन्धन मात्रै नपुगेर एउटा समाजवादी मोर्चा बनाउने रे । समाजवादी मोर्चा किन बनाउने भन्दा एउटा नेकपा एमालसँग मुकाबिला गर्न र अर्को कांग्रेस तर्साउन ।’

आफूहरूले अब एउटा राष्ट्रिय शक्ति बनाएर अघि बढ्नुपर्ने भन्दै उनले उक्त शक्ति देश, जनता र विकासप्रति समर्पित बन्ने खालको हुनुपर्ने विश्वास व्यक्त गरे । ‘समाजवादी मोर्चा बनाएर हुन्छ के ? किन बनाउने ? तिनै चिनेका मान्छे हुन्, सँगै हिँडिरहेकै हो, लिभिङ टुगेदर चलेकै थियो । हामी एउटा यस्तो राष्ट्रिय शक्ति निर्माण गर्नुपर्छ, जो देश, जनता, विकासप्रति समर्पित होस् । चारतिर फर्किएका चारतिरका फरक उद्देश्यका तत्त्वहरू एक ठाउँमा जम्मा भएर राष्ट्रिय शक्ति बन्दैन ।’

ओलीले अनुपयोगी भएकाले ७० वर्षको उमेरहद हटाउने निर्णय गर्नु परेको बताए । ७० वर्ष माथिकाले काम गर्न सक्ने अवस्थामा पनि राजनीति छोड्नुपर्ने अप्ठ्यारो अवस्था आएको, कतिपय अन्य पार्टीबाट आएका नेताहरुलाई पनि जिम्मेवारी दिनुपर्ने भएकाले उमेरहद हटाउने निर्णय गर्नु परेको ओलीको स्पष्टीकरण थियो । 

उनले चीनलगायत दुनियाँका सबै पार्टीहरूले परित्याग गरिसकेको ७० वर्षे उमेरहद हटाउने निर्णय एमालेले गर्दा त्यसको विरोध गर्न आवश्यक नभएको बताए । उनले केहीले पार्टीको उक्त निर्णयको विरोध गरेर अराजनीतिक कुरा गरेको आरोपसमेत लगाए ।