एनआरएनएका दुई पक्षका बीचको सहमति अमान्यः अध्यक्ष मरासिनी

३ असार, क्यालिफोर्निया । परदेशमा बस्ने नेपालीहरूको साझा संस्था एनआरएनए नन रेसिडेन्ट नेपाली एसोसिएसन अन्तर्राष्ट्रिय समन्वय समितिका अध्यक्ष समेत रहेका गैर आवासीय नेपाली संघका आजीवन सदस्य माधव मरासिनीले गैर आवासीय नेपाली संघका दुई समूह बीच एकता हुने सहमति अवैंधानिक रहेको दाबी गरेका छन् । 

आइतबार दुई समूह बीच एक हुने सहमति भएसँगै अध्यक्ष मरासिनीले एक विज्ञप्ति जारी गर्दै कथित संस्थापन पक्ष विधानतः अवैधानिक, अलोकप्रिय र राजनीतिक आधारमा गठन भएको गुट भएको यसले गरेको सहमतिलाई वैधानिक मान्न नसकिने बताएका छन् । 

यस अघि अलिकति भएपनि इमानदार भनेर मानिएको शेष घले समूहले अवैधानिक समूहसामु घुँडा टेकेर आफ्नो नैतिकता गुमाएको भन्दै अध्यक्ष मरासिनीले आफू लगायत अमेरिकाका चार जना आजीवन सदस्यहरूको टुंगो नलागेसम्म यो सहमति लागू हुन नदिने चेतावनी दिएका छन् । 

पूर्वाग्रही ढंगबाट खारेज गरिएको सदस्यता पुर्नवहाली कानुनी रुपमा गर्नु परेमा यो निकै महँगो पर्ने र यो दुई समूह बीच ‘एक हुने’ सहमति तोरी र कोदोको मिलन जस्तै भएकोले यसले 'न तेल त न पिठो' केही नदिने भएकोले त्यसको परिणाम दुर्घटना भएको उनको भनाई रहेको छ ।