सरकारले वार्तामा बाेलाएपछि स्थगन गरे सामुदायिक विद्यालयका कर्मचारीले आन्दोलन

३ असार, काठमाडौं । सामुदायिक विद्यालयमा कार्यरत विद्यालय कर्मचारीहरुको आन्दोलन स्थगित भएको छ । शिक्षा मन्त्रालयले पत्रकार काटेर वार्तामा बोलाएकाले आन्दोलन स्थगित गरिएको हो ।

नेपाल विद्यालय कर्मचारी युनियन, नेपाल सामुदायिक विद्यालय कर्मचारी संघ र नेपाल विद्यालय कर्मचारी परिषद्ले आज संयुक्त विज्ञप्ति जारी गर्दै आन्दोलनको कार्यक्रम तत्कालका लागि स्थगन गरिएको जनाएको छ ।

शिक्षा विज्ञान तथा प्रविधि मन्त्राललयले सरकारको तर्फबाट वार्ता टोली गठन गरि संवादको वातावरण निर्माण गर्दै वार्तामा आउन आहृवान गरिएको र आम जनभावनाको उच्च कदर गर्दै विद्यालय बन्दको कार्यक्रम तत्कालका लागि स्थगन गरिएको जारी विज्ञप्तिमा उल्लेख छ । 

सामुदायिक विद्यालयमा कार्यरत विद्यालय कर्मचारीहरुलाई हालसम्म पनि ८ हजारदेखि १३ हजार ५ सय रुपैयाँ मासिक पारिश्रमिकमा काम गर्न बाध्य रहेकाले सरकारले आगामी आर्थिक वर्ष २०८०/८१ को नीति तथा कार्यक्रममा उल्लेख गरिएअनुसार बजेटमा सेवा र सुविधामा वृद्धि हुनुपर्ने मागसहित आजदेखि देशभरका विद्यालय अनिश्चितकालीन बन्दमा उत्रिएका थिए । जसका कारण विद्यालयमा पठनपाठन प्रभावित हुन पुगेको छ । काठमाडौं उपत्यकामा पनि बन्दको प्रभाव परेको छ ।