स्वास्थ्य क्षेत्रमा श्वेतपत्र जारी गर्न सांसद खतिवडाको माग

३ असार, काठमाडौं । नेपाली कांग्रेसका सांसद रामहरि खतिवडाले मुलुकभर नागरिकको स्वास्थ्योपचार अवस्था विकराल बनेको भन्दै श्वेतापत्र तत्काल जारी गर्न सरकारसँग माग गरेका छन् । 

आइतबार बुधबारको प्रतिनिधिसभाको बैठकमा मन्त्रालयगत विनियोज शीर्षकमाथि छलफलमा भाग लिँदै सांसद खतिवडाले यस्तो बताएका हुन् । आगामी आव २०८०/८१ का लागि वार्षिक बजेटमा स्वास्थ्य मन्त्रालयमा छुट्याइएको बजेटमाथि धारणा राख्दै सांसद खतिवडाले नागरिकले सिटामोल समेत सहज रुपमा पाउन नसकेको भन्दै उपचारका अभावमा अकालमा ज्यान गुमाउन विवश भइरहेको बताए । 

उपचार अभावमा नागरिकको थप ज्यान जानबाट रोक्न स्वास्थ्य मन्त्रालयले श्वेता पत्र जारी गरेर उपचारको भरपर्दो माध्यम बनाउन स्वास्थ्यमन्त्रीसँग माग गरे । उनले आउने आर्थिक वर्षबाटै सरकारले ७० वर्ष नाघेका नागरिकका सम्पूर्ण उपचार निःशुल्क गर्ने व्यवस्था गर्न स्वास्थ्यमन्त्रीको ध्यानाकर्षण गराए । 

उनले संघीय मामिला तथा प्रशासनतर्फको विनियोजित रकमबारे धारणा राख्दै देशभित्र निजामती कर्मचारीको तथ्यांक सार्वजनिक गर्न माग गरे । मन्त्रालयका सुब्बाले सचिव हेरफेर गर्ने दृष्टान्त पेस गर्दै नियमबमोजिम सरुवा बढुवा र स्थानान्तर गर्न सुझाव दिए । 

खतिवडाभन्दा पहिले बाेल्ने सांसदहरूले ज्येष्ठ नागरिककाे नि:शुल्क उपचार गराउने व्यवस्था गर्न सरकारकाे ध्यानाकर्षण गराएका थिए ।

गठबन्धन सरकारमा स्वास्थ्य मन्त्रालय नेपाली कांग्रेसले सम्हालिरहेको छ । कांग्रेस सांसद मोहनबहादुर बस्नेत स्वास्थ्य मन्त्री छन् ।