काठमाडौंका मेयर बालेनविरुद्ध ३० करोड क्षतिपूर्ति माग गर्दै उच्च अदालत पाटनमा रिट दायर

३ असार, काठमाडौं । निजी शैक्षिक संस्थाको साझा सञ्जालले काठमाडौं महानगरपालिकाले गैर न्यायिक हस्तक्षेप गरी शैक्षिक मेला रोकेको भन्दै काठमाडौं महानगरपालिकाका मेयर बालेन शाह विरुद्ध उच्च अदालत पाटनमा ३० करोड क्षतिपुर्ति माग गर्दै रिट दायर गरिएको छ । 

आइतबार सञ्जालमा आबद्ध विभिन्न ९ संघसंस्थाले सामूहिक पत्रकार सम्मेलन गरी सो जानकारी दिएका छन् । कार्यक्रमपछि जारी गरिएको विज्ञप्तिमा महानगरको ज्यादतीपूर्ण हस्तक्षेपको निन्दा र भर्त्सना गरिएको छ ।  कार्यक्रममा ४ दिनदेखि बिना जानकारी मेला रोकिएपछि न्यायका लागि अदालत पुगेको हिसान अध्यक्ष रमेश सिलवालले बताए । 

३० करोड रूपैयाँ क्षतिपूर्ति र तत्काल मेला सञ्चालनको माग गर्दै उच्च अदालत पाटनमा रिट दायर गरिएको पत्रकार सम्मेलनमा उनले जानकारी दिए । मेलास्थलमा नै पत्रकार सम्मेलन गरिएको थियो । उक्त मेला नरोकिएको भए आइतबार (आज) सकिने कार्यक्रम थियो ।

मेला उद्घाटन हुने बित्तिकै महानगर प्रहरी प्रमुख राजु पाण्डेको नेतृत्वमा खटिएको टोलीले स्टलहरू बन्द गराएर भृकुटीमण्डपस्थित मेलास्थलमा ताला लगाएको थियो । मेलास्थलमा बिजुलीसमेत काटिएको संयोजक टंकराज आचार्यले बताए ।

शिक्षा समर्पित प्राज्ञिक वर्ग, विद्यार्थी र अभिभावकको कार्यक्रममा बर्दीधारी प्रहरी परिचालन गरेर शैक्षिक क्षेत्रलाई त्रासपूर्ण बनाउने काम गरिएको विज्ञप्तिमा उल्लेख छ । मेला आयोजक हिसानसहित प्याब्सन, एन प्याब्सन, स्वास्थ्य विज्ञान तथा प्रविधि मञ्च, पोखरा विश्वविद्यालय अन्तरगतको ओपेन, पूर्वाञ्चल विश्वविद्यालयको पीयूक्यान, ईकोन, स्वास्थ्य विज्ञान शिक्षालय संघ (एसिया), निजी प्राविधिक शिक्षालय महासंघले संयुक्त विज्ञप्ति जारी गरेका हुन् ।

यो कक्षा १० सम्मको मात्र मेला थिएन । विश्वविद्यालय र सीटीईभीटीका कलेज पनि सहभागी थिए । अघिल्लो वर्ष पनि मेयर बालेन्द्र शाह नै हुँदा यस्तै मेला गरिएको थियो, यसपाली किन रोकटोक भयो ? अहिलेसम्म केही जानकारी पाएको छैन । महानगरका कर्मचारी मेयरको आदेश हो भन्दै पन्छिने गरेको हिसान पदाधिकारीले जनाए ।