सरकारी संचारमाध्यमलाई बीबीसी मोडलमा लैजान सांसद केसीको सुझाव

४ असार, काठमाडौं । नेपाली कांग्रेसका सांसद अर्जुननर सिंह केसीले सरकारी संचारमाध्यम गोरखापत्र, रेडियो नेपाल, रासस र नेपाल टेलिभिजनलाई एकीकृत कार्ययोजना नीतिअन्तर्गत संचालन गर्नुपर्ने बताएका छन् ।

सांसद केसीले सोमबार प्रतिनिधिसभाको बैठकमा आगामी आर्थिक वर्ष २०८०/८१ का लागि संचार, परराष्ट्र र ऊर्जा मन्त्रालयमा विनियोजित बजेट शीर्षकमाथि छलफलमा भाग लिँदै सरकारको स्वामित्वमा चलेका रेडियो, अनलाइन, छापा र टेलिभिजन संचार माध्यलमलाई एकीकृत नीति बनाएर संचालन गर्ने व्यवस्था गर्न संचार मन्त्रालयको ध्यानाकर्षण गराए । हरेक संचार गहृलाई अलगअलग बजेट दिने प्रथा अन्त्य गरेर आफ्नो व्यवस्थापनमा चल्न सक्ने गरी नीति बनाउन सुझाव दिए ।

‘सरकारी सबै संचारमाध्यमलाई बरु बीबीसीको मोडलमा लैजाँदा राम्रै हुने देखिन्छ, के गर्दा आर्थिक भार पर्दैन त्यो ढंगबाट संचालन गर्ने व्यवस्था गर्नुपर्छ’ उनले भने ।

साथै प्रविधिको दुरुपयोग बढेको भन्दै गलत समाचार प्रवाह गर्ने अनलाइन प्रयोकर्ता सर्वसाधारणदेखि संचारमाध्यमसम्मलाई कारवाहीको दायरामा ल्याउने व्यवस्था गर्न माग गरे । आफू पूर्ण  प्रेस स्वतन्त्रताको पक्षमा रहेको बताउँदै स्वतन्त्रताको दुरुपयोगबारे ध्यान दिन आग्रह गरे ।

यस्तै, सर्वसाधारणलाई बिजुलीमा उल्लेख्य मात्रामा सहुलियत दिने व्यवस्था गर्नुपर्ने बताउँदै उत्पादनमा विदेश लगानी आउने बाटो सुरक्षित हुनुपर्नेमा जोड दिए । परराष्ट्र नीति पछिल्लो समयमा केही सुधार गर्नुपर्ने आवश्यकता रहेको बताए । पश्चिमा, भारत र चीनको त्रिपक्षीय अवस्थालाई मिलाएर अगाडि बढ्ने किसिमबाट वैदेशिक नीति तय हुनुपर्ने बताए ।