उपप्राध्यापक प्रेम चलाउनेको पक्षमा प्रर्दशन गर्नेहरू पक्राउ, न्याय दिन सांसदको माग

५ असार, काठमाडौं । २०७७ असो २० मा विद्यार्थीहरुको एक समूहकाे आक्रमणबाट सख्त घाइते त्रिविका समाजशास्त्रका उपप्रध्यापक प्रेमबहादुर चलाउनेको न्यायका लागि काठमाडौंमा प्रदर्शन भएको छ ।अभियन्ता र नागरिक अगुवाहरुको सहभागितामा प्रदर्शन भएको हो । उनीहरूलाइ प्रहरीले केहीबेर अघिमात्र बल प्रयाेग गरी पक्राउ गरेकाे छ ।

चलाउनेले त्रिवि कार्यालयमा सोमबारदेखि आमरण अनसन सुरु गरेका छन् । सुरुमा जिल्ला अदालत काठमाडौं परिसरमा अनसन सुरु गरेपनि प्रहरीले हटाएपछि त्रिविमा पुगेका हुन् । उनी पनि मंगलबारकाे प्रदर्शनमा सहभगी भएका छन् ।

त्रिविभित्र रहेको बैंकको एटीएम बुथमा रकम निकाल्न जाने क्रममा नेविसंघका तत्कालीन त्रिवि ईकाइ अध्यक्ष योगेन्द्र आचार्यसहितको टोलीले फलामको रडले हिर्काएर मरणासन्न अवस्थामा छाडिएका उद्धारपछि उनी बाँचेका थिए । अहिले पनि उनी बैशाखीको सहरामा हिँडडुल गर्दै आइरहेका छन् ।

उनको जाहेरीका आक्रमणकारी आचार्यसहित ४ जनाविरुद्ध मुद्दा चलेकामा गएको जेठ ३० मा बसेको मन्त्रिपरिषद्को बैठकले मुद्दा फिर्ता लिने निर्णय गरेपछि घाइतेसहित अभियन्ता, अधिकारकर्मीहरु आन्दोलनमा उत्रिएका हुन् । उनीहरु आज बिहान काठमडौं जिल्ला अदालत अगाडि ‘प्रेम चलाउनेलाई न्याय दे, न्याय मरे कहाँ जाने ?, अपराधलाई राजनीतिकरण गर्न पाइँदैन’ जस्ता नारा लेखिएको ब्यानर र प्लेकार्ड प्रदर्शन गरेका छन् । आन्दोलनकाे नेतृत्व बृहत नागरिक आन्दोलनले गरेकाे छ ।

यसैबीच आज जारी प्रतिनिधिसभाको बैठकमा रास्वपाका सांसद सन्तोष परियारले शून्य समयमा बोल्दै घाइते उपप्रध्यापक चलाउनेलाई न्याय दिन सरकारको ध्यानाकर्षण गराएका छन् । चलाउनेमाथि आक्रमण गर्ने अभियुक्तहरुविरुद्धको मुद्दा फिर्ता लिने सरकारको निर्णय स्थगन गरेर मुद्दाको अन्तिम सुनुवाइ गर्ने बाटो बन्द नगर्न माग गरे । ‘न्याय मरे नागरिक कहाँ जाने ?’ भन्दै सरकारसँग प्रश्न गरे ।

मुद्दाको अन्तिम सुनुवाइका लागि आज पेसी तोकिएको छ । तर सुनुवाई हुनु हप्ता दिअगाडि नै सरकारका महान्यायाधिवक्ताको कार्यालयको सिफारिसमा मुद्दा फिर्ता लिने निर्णय गरेको थियो ।