नागरिकता पीडितको आन्दोलनमा प्रहरीको धरपकड, दर्जन बढी पक्राउ

५ असार, काठमाडौं । नागरिकता माग गर्दै लामो समयदेखि माइतीघर मण्डलामा सडक अवरुवद्ध गरी धर्नामा बसिरहेका धर्नाकारीहरुमाथि प्रहरीले धरपकड मच्चाएको छ । आज दिउँसो नेपाल प्रहरी र सशस्त्र प्रहरीको टोलीले बल प्रयोग गरी दर्जनौं धर्नाकारीहरुलाई पक्राउ गरी धनास्थलबाट हटाइएको छ । 

हप्तौंदेखि सडकमै खाजा, खाना खाएर धर्नामा बसिरहेका युवाहरुलाई हस्तक्षेप गरी हटाइएको हो । पक्राउका क्रममा धर्नाकारी र प्रहरीबीच निकैबेर ठेलमठेल र झडप समेत भएको थियो । 

प्रहरीले भने निषेधित क्षेत्रमा प्रवेश गरेपछि धर्नाकारीहरुलाई नियन्त्रणमा लिइएको दाबी गरेको छ । 
राष्ट्रपति रामचन्द्र पौडेलले गएको जेठ १७ गते प्रमाणीकरण गरेको नागरिकता विधेयक १९ गते नेपाल राजपत्रमा प्रकाशित भएपछि ऐन बनेको थियो । तर प्रमाणिकरण प्रक्रिया संविधानविपरीत भएको भन्दै सर्वोच्च अदालतमा परेको मुद्दामा अल्पकालीन अन्तरिम आदेश दिँदै सर्वोच्चले ऐन तत्काल कार्यान्वयन नगर्न भनेपछि नागरिकता दिनेबाटो बन्द अवस्थामा छ । 

बन्दपछि मुख्यगरी मधेश प्रदेशका युवा पंक्ति नागरिकताको माग गर्दै आन्दोलनका लागि काठमाडौं आएका छन् । नागरिकताको अभावमा बैंक खाता खोल्न, रोजगारी गर्न, विदेश जान, सामाजिक कार्यमा समेत कठिन भएको भन्दै तत्काल नागरिकता पाउनुपर्ने माग गरेका छन् । सांसदहरुले पनि संसद बैठकमा नागरिकता दिने बाटो तत्काल खोल्न माग गर्दै आइरहेका छन् । 

तर संसदमा रहेका कुल सदस्य २७५ मध्ये रहेका प्रतिपक्षी एमाले, रास्वपा, राप्रपासहित झण्डै  ११० रहेका दलहरुले पनि विधेयक प्रमाणिकरणमा अपनाइएका प्रक्रियाले संविधान मिचेको र विधेयकलाई संसदमा ल्याएर छलफलपछि मात्र प्रमाणिकरणका लागि राष्ट्रपतिसमक्ष संसदका वर्तमान सभामुखबाट पेस हुनुपर्ने माग गर्दै आइरहेकाछन् । 

राष्ट्रपति पौडेलले प्रमाणिकरण गरेका विधेयक निवर्तमान राष्ट्रपति विद्यादेवी भण्डारीका पालामा राष्ट्रपति कार्यालय शितलनिवासमा तत्कालीन सभामुख अग्निप्रसाद सापकोटाले पेस गरेका थिए । तर भण्डारीले विधेयकमा रहेको व्यवस्था न्यायिक नरहेको भन्दै प्रमाणिकरण नगरी थन्याइदिएकी थिइन् । सोही विधेयकलाई पौडेलले प्रमाणिकरण गरिदिएपछि सांसदहरुबीच विवाद भएको हो । 

मुख्य गरी जन्मसिद्ध नागरिकता प्राप्त गरेका बाबुआमा सन्तानलाई नयाँ ऐनले वंशजको आधारमा र नेपाली पुरुषसँग विहे गरेका विदेशी महिलालाई विवाह लगत्तै नागरिकताा दिने व्यवस्थाप्रति सांसदहरुबीच फरक मत रहेको छ । यसअघि विवाह गरी आएकी विदेशी महिलालाई १५ वर्षपछि मात्र नागरिकता दिने व्यवस्था थियो । 

धर्नाकै क्रममा यसअघि विराटनरका निरज कामतले शरीरमा पेट्रोल छर्केर आगो लगाएर आत्मदाहको प्रयास गरेका थिए ।