बजेटप्रति गाेकुल बास्काेटाकाे असन्तुष्टी, भने- ‘संसदमा कालाे झण्डा बोकेर आउन नपरोस् ’

५ असार, काठमाडौं । संघीय संसदअन्तर्गत प्रतिनिधिसभाको बैठकमा सांसदहरुले बजेटको पक्ष र र विपक्षीमा धारणा राख्ने क्रम जारी छ । आइतबारको बैठक १५ मिनेटका लागि स्थगितपछि शुरु भएको बैठकमा उनीहरुले शहरी विकास, अर्थ, श्रम र खानेपानी मन्त्रालयमाथिको आगामी आवको विनियोजित बजेटमाथि छलफलमा धारणा राखिराखेका छन् । 

मन्त्रालयहरुको खर्च कटौती प्रस्ताव राख्दै प्रमुख प्रतिपक्षी एमालेका सांसद गोकुल बास्कोटाले बजेट असन्तुलित र विभेदकारी रहेको भन्दै विरोध गरेका छन् ।

उनले काभ्रेका पनौती नगरपालिकामा जम्मा १२ वटा वडा मात्र रहेको तर शहरी विकास मन्त्रालयले १३ र १४ नं. उल्लेख गरेर बजेट विनियोजन गरेको पाइएको भन्दै सरकारको चर्को आलोचना गरे । उनले बजेट संशोधन गर्न सुझाव दिए । भने, ‘बजेट संशोधन गरियोस्, अन्यथा संसदमा कालो झण्डा देखाउन नपरोस् ।’

मन्त्रीहरुले कतिपय क्षेत्रमा हुँदै नभएको वडा र र स्थानमा बजेट छुट्याएर तमासा देखाएको भन्दै दलालहरुले दिएको चिर्कटका आधारमा बजेट विनियोजन गरेको टिप्पणी गरे ।

‘हुँदै नभएको वडा नं. देख्ने चश्मा कसले किन्दियो’ उनले प्रश्न गरे । उनले नगरकोटको हिकुवा पाटी क्षेत्रमा निरन्तरतामा रहेको सडक लगायत पूर्वाधारमा बजेट कटौती गरेको भन्दै आपत्ति जनाए । उनले बजेटको समर्थन गर्न नसक्ने बताउँदै विनियोजित बजेटमा एक रुपैयाँ कटौती गर्न प्रस्ताव गरे ।