‘हजार र पाँच सयका नोट विस्थापन गरौं, जमिनमुनि राखिएका पैसा बाहिर निकालौं’

५ असार, काठमाडौं । सत्तारुढ नेकपा (एकीकृत समाजवादी)का सांसद मेटमणि चौधरीले निश्चित समयका लागि एक हजार र पाँच सय दरका नोट विस्थापन गर्नुपर्ने बताएका छन् ।

मंगलबार प्रतिनिधिसभाको बैठकमा अर्थ सहित ४ मन्त्रालयको विनियोजित बजेटमाथिको छलफलमा धारणा राख्दै सांसद चौधरीले दुई ठूला दरका नोट विस्थापन गरेर जमिनमुनि लुकाएर राखिएका माफिया र बिलौलिया–दलालको अवैध धन प्रयोगमा ल्याउनुपर्ने बताए । 

उनले अनौपचारिक माध्यमबाट थुप्रै पैसा देशबाहिर गइरहेको र यसलाई रोक्न अर्थ मन्त्रालयले ठोस नीति ल्याउन सुझाव दिए । आर्थिक संकट टार्ने नाममा थुप्रै संख्यामा ठूला दरका नोट लुकाएर राखेको र यसलाई बाहिर ल्याउन ठूला नोटलाई केही समयका लागि निश्चित मूल्य तिरेर सरकारले खिच्नुपर्ने बताए । 

उनले अहिले धन मान्ने आधार परिवर्तन भएको भन्दै नीतिमा पनि परिवर्तन गर्न आवश्यक रहेको धारणा राखे । पहिले भैंसीलाई धन मानिन्थ्यो, अहिले त बैंकमा रहेको पैसा समेत मान्न छाडिएको पाइन्छ’ उनले भने, ‘अहिले त क्रिप्टो करेन्सीलाई मात्र धन मान्ने मान्यता अगाडि आएको छ । यसकारण यसलाई नियमन गरेर पैसा विदेश पलायन हुनबाट रोक्न कडा नीति ल्याउनु अनिवार्य भइसकेको छ ।’ बैंक ऋणकाे ब्याजदर नघटाएसम्म वित्तीय क्षेत्रमा सुधार ल्याउन नसक्ने बताए । 

यस्तै, चौधरीले वैदेशिक रोजगार जाने श्रमिका लागि दक्ष र सीपयुक्त बनाएर पठाउन सीप प्रतिष्ठान स्थापना गर्न सुझाव दिए । रेमिट्यान्समा लगाइरहेको कर हटाउन सुझाव दिए । कर हटाउन हुण्डीबाट रेमिट्यान्स पठाउने क्रम रोकिने र रेमिट्यान्सको सही तथ्यांक आउने बताए । ‘हाम्रा नागरिकले विदेशमा पसिना बगाएर जति रेमिट्यान्स पठाउनुहुन्छ, उहाँहरुलाई त्यसमा केही रकम थप गरेर उत्पादनमा लाग्ने वातावरण बनाउँ’ उनले भने ।