सांसद केसी पनि नोटबन्दीको पक्षमा उभिए

५ असार, काठमाडौं । पूर्वमन्त्री एवं नेपाली कांग्रेसका सांसद अर्जुन नरसिंह केसीले भ्रष्टाचारीको अवैध रकम बजारमा ल्याउन नोटबन्दी गर्नुपर्ने बताएका छन् ।

आइतबार प्रतिनिधिसभाको बैठकमा अर्थ मन्त्रालयमाथिको विनियोजन विधेयकमा धारणा राख्ने क्रममा सांसद केसीले भ्रष्टाचारी र बिचौलियाले अकूत मात्रामा पैसा घर घरमा लुकाएर राखेको र यसलाई बजारमा ल्याउन तत्कालका लागि एक जहार र पाँच सय दरका नोटमा प्रतिबन्ध लगाउनुपर्ने बताए । 

मुलुकको अर्थतन्त्र भ्रष्टाचारी र बिचौलियाले ठूला दरका नोट लुकाए राखेकै कारण संकटतर्फ गइरहेको र बजारमा पैसा अभाव हुन पुगेको बताए । लुकाएर राखिएको नोट प्रयोगमा ल्याउन सके पैसाको अभाव केही हदसम्म कमी हुने उनको भनाइ छ । 

केसीभन्दा अघि बोल्ने सांसद मेटमणि चौधरीले हजार र पाँच सय दरका नोट प्रयोगमा प्रतिबन्ध लगाउनुपर्ने धारणा राखेका थिए । सांसद केसी पनि नोटमाथि प्रतिबन्ध लगाउनुपर्ने पक्षमा उभिएका हुन् ।