आरती साह मृत्यु प्रकरणः पीडित पक्षद्वारा धनुषा जिल्ला अदालतमा ढुंगामुढा

६ असार, काठमाडौं । जनकपुरधाम उपमहानगरपालिका– ९ थापा चोकमा बस्दै आइरहेकी २२ वर्षीया आरती साहको गएको जेठ ७ गते शंकास्पद मृत्यु घटनामा धनुषा जिल्ला अदालतमा मुद्दा अन्तिमा सुनुवाइको चरणमा रहेको छ । 

प्रकरणमा प्रहरीले चलाएको कर्तव्य ज्यान मुद्दामा मृतक आरतीका पति मोतीबाबु साह, ससुरा मदन मोहन सुडीलाई जिल्ला अदालतको आदेशमा पुर्पक्षका लागि मंगलबार जेल चलान भएको छ । घरभित्र झुन्डिएको अवस्थामा मृत फेला परेकी आरतीको हत्या भएको भन्दै आरतीका माइती पक्षले प्रहरीमा जाहेरी दिएका थिए । जाहेरीका आधारमा पक्राउ गरी गरी प्रहरीले जिल्ला सरकारी वकिलको कार्यालयमार्फत मुद्दा चलाएको हो । मुद्दा असार १ मा थुनछेक बहसपछि उनीहरू जेल चलान भएका हुन् । 

आरतीको ‘हत्या’का अन्य व्यक्तिको पनि संलग्नता रहेको दाबी गर्दै तिनलाई प्रहरीले जोगाउन खोजेको आरोपमा मुद्दाका पक्षधरले मंगलबार अदालत परिसरमा नाराबाजी गर्दै ढुंगामुढा गरे । 

भित्र थुनछेक बहस चलिरहेका बेला परिसरमा जम्मा भएका पीडित पक्षका मानिसहरूले अचानक अदालतभित्र ढुंगामुढा गरेका थिए । प्रदर्शनकारीलाई हटाउने क्रममा प्रहरीले लाठी चार्ज समेत गरेको थियो । गोविन्द साहलाई पक्राउ गरिएको छ । प्रदर्शनकारीहरूले जिल्लाका प्रहरीका एसपी र डीएसपीलाई निलम्बन गर्न माग गरेका छन् । आरतीलाई न्याय दिन भन्दै काठमाडौंको माइतीघरमा समेत धर्ना दिएका छन् ।

अभियुक्त पति मोतीबाबु र ससुराले दाइजो नल्याएको निहुँमा पटक पटक कुटपिट र मानसिक यातना दिँदै आएको अवस्थामा हत्या गरेर आत्महत्या गरेको भनेर नाटक रचेको उनीहरूको आरोप छ । दुवै जनालाई जेल सजाय हुनुपर्ने माग उनीहरूको छ ।

अदालतमा ढुंगामुढा भएको घटनामा बुधबार संसद बैठकमा सांसदहरुले विषय उठान गरेका छन् ।उनीहरूले कानुन मन्त्रालयमाथि विनियोजित बजेटमाथि धारणा राख्ने क्रममा मुलुकमा न्याय दिने काममा ढिला भइरहेको र निष्पक्षतामाथि समेत नागरिकले प्रश्न उठाउने काम भइरहेको भन्दै त्यसतर्फ विशेष ध्यान दिन सांसद अमरेशकुमार सिंह लगायतले कानुन तथा संसदीय मामिला मन्त्री धनराज गुरुङको ध्यानाकर्षण गराएका छन् ।