पूर्व बैंकर अनिल शाह रास्वपाकाे प्रशिक्षण विभाग प्रमुखमा चयन

७ असार, काठमाडौं । पूर्व बैंकर अनिल केशरी शाह राष्ट्रिय स्वतन्त्र पार्टी (रास्वपा) का प्रशिक्षण विभाग प्रमुखमा चयन भएका छन् । शाह केही दिन पहिले मात्र रास्वपा प्रवेश गरेका थिए । 

बिहीबार बसेको रास्वपाको केन्द्रीय समिति र संसदीय दलको संयुक्त बैठकले उनलाई प्रशिक्षण विभागको प्रमुखमा चयन गरेको केन्द्रीय सदस्य गणेश कार्कीले बताए । शाह नबिल बैंक तथा मेगा बैंकको प्रमुख कार्यकारी अधिकृत (सीईओ) जिम्मेवारी सम्हालिसकेका व्यक्ति हुन् । 

रास्वपाले पार्टी स्थापना दिवसको अवसरमा आज दिउँसो १ बजे चियापान कार्यक्रमको आयोजना गरेको छ । कार्यक्रममा सबै राजनीतिक दलका शीर्षस्थ नेता, नेता, बुद्धिजीवी, सांसद, सुरक्षा निकायका प्रमुख, कूटनीतिक नियोगका प्रमुख, उद्योगी, व्यवसायीहरूलाई आमन्त्रण गरिएको केन्द्रीय सदस्य दीपक बोहोराले जानकारी दिए ।

रास्वपा गत वर्ष वैशाख १० मा स्थानीय चुनाव सम्पन्न पछि झन्डै ३ महिनापछि असार ७ गते काठमाडौंका घोषणा भएको पार्टी हो । त्यसपछि मंसिर ४ मा भएको आमनिर्वाचनमा प्रत्यक्ष र समानुपातिक गरी २० सिट जितेको जित्यो । त्यसपछि गएको वैशाख १० मा भएको उपनिर्वाचनमा १ सिट हात पारी २१ सिट पुर्याएको छ ।

संसदमा रास्वपा चौथो दल बनेको छ । रास्वपाका पछिल्लो समयमा पुराना र परम्परागत राजनीति दलका लागि चुनौती बनेर खडा भएको ठानिएको छ ।

रास्वपा गैर राजनीतिक पृष्ठभूमिबाट गएका व्यक्तिहरूबाट बनेको पार्टी मानिन्छ । पार्टी सभापति रवि लामिछाने स्वयं संचार क्षेत्रबाट गएका हुन् । उपनिर्वाचनमा तनहुँबाट संघीय सांसद पदमा विजयी भएका गोरखाका डा. स्वर्णिम वाग्ले विज्ञताका रुपमा प्रवेश गरेका थिए ।