काठमाडौंमा भारतीय फिल्मको प्रदर्शन नरोक्न उच्च अदालतको अल्पकालीन आदेश

७ असार, काठमाडौं । उच्च अदालत पाटनले काठमाडौंका फिल्म हलहरुमा भारतीय फिल्मको प्रदर्शन नरोक्न अल्पकालीन अन्तरिम आदेश जारी गरेको छ ।

नेपाल चलचित्र संघले बुधबार दायर गरेको रिटमा आज सुनुवाइ गर्दै न्यायाधीश धिरबहादुर चन्दको एकल इजलासले भारतीय फिल्मलगायत सेन्सर बोर्डले अनुमति दिएका कुनैपनि चलचित्रको प्रदर्शन नरोक्न अल्पकालीन अन्तरिम आदेश जारी गरेको हो । साथै अन्तरिम आदेश दिने नदिनेबारे छलफलका लागि रिटका दुवै पक्षका यही असार १२ गते छलफलका लागि बोलाउने आदेश पनि भएको छ । 

भारतीय चलचित्र आदिपुरुषमा रहेको जानकी ‘भारतीय छोरी हुन्भ’ भन्ने संवाद नहटाएको भन्दै काठमाडौं महानगरपालिकाका मेयर बालेन शाहले गत सोमबारदेखि भारतीय चलचित्र प्रदर्शनमा रोक लगाएका थिए । रोक लगाएपछि संघ उच्च पुगेको थियो ।