नगरपालिकाका पूर्वमेयर विष्टसहित १२ जनाविरूद्ध भ्रष्टाचार मुद्दा

१० असार, काठमाडौं । कञ्चनपुरको भीमदत्त नगरपालिकाका पूर्वमेयरसहित १२ जनाविरूद्ध अख्तियार दुरुपयोग अनुसन्धान आयोगले भ्रष्टाचारको मुद्दा दायर गरेको छ । 

आयोगको केन्द्रीय कार्यालय टंगालले पूर्वमेयर सुरेन्द्रबहादुर विष्ट, तत्कालीन प्रमुख प्रशासकीय अधिकृत पुष्करप्रसाद भट्ट, तत्कालीन निमित्त प्रमुख प्रशासकीय अधिकृत हरिदत्त जोशी, वडा नं. का वडाध्यक्ष हिमालबहादुर चन्द, प्रशासकीय अधिकृत हरिसिंह धामी, शाखाअधिकृत नरबहादुर शाह, इन्जिनियर हिमालय सिंह ऐर र गोविन्दराज उपाध्यायविरुद्ध आइतबार विशेष अदालतमा मुद्दा दायर भएको प्रवक्ता भोला दाहालले जानकारी दिए । 

निर्माण ठेक्का र ठेक्काको भुक्तानीमा राज्यलाई हानी क्षति पुग्ने गरी रकम हिनामिना गरेर भ्रष्टाचार गरेको अभियोग मुद्दाका प्रतिवादीहरुमाथि लगाइएको छ । प्रतिवादीहरुबाट आर्थिक वर्ष २०७७/०७८ मा झण्डै साढे ५ करोड भन्दा बढी भ्रष्टाचार गरेको दाबी गरिएको छ ।

साथै भवानी कन्स्ट्रक्शन प्रालिका संचालकहरू केशवराज भट्ट, पुष्पराज भट्ट, आधिकारिक प्रतिनिधिहरू दिवाकर भट्ट, इश्वरीप्रसाद भट्टको नजिकको हकदार श्रीमती खगेश्वरी भट्टविरूद्ध मुद्दा दायर भएको हो । इश्वरीप्रसाद भट्टको निधन भइसकेको अवस्थामा खगेश्वरीलाई प्रतिवादी बनाइएको हो ।

मुद्दामा उनीहरूसँग बिगाे, जरिवाना र कैद सजायको मागदाबी गरिएको छ ।