डीएसपी ठगबहादुरविरुद्ध भ्रष्टाचारकाे मुद्दा दायर गरिँदै

१० असार, काठमाडौं । तस्करबाट बरामद भएको ३५ तोला सुनसहित पक्राउ परेका रुपन्देहीको बुटवल इलाका प्रहरी कार्यालयका तत्कालीन प्रमुख प्रहरी नायव उपरीक्षक (डीएसपी) ठग बहादुर केसीविरुद्ध भ्रष्टाचार मुद्दा दायर गर्ने तयारी अख्तियार दुरुपयोग अनुसन्धान आयोगले गरेको छ । 

गत पुस ११ गते ३५ तोला सुन र सुन फिर्ताका घुस रकम दिएको चेकसहित सीआईबीको टोलीले पक्राउ गरेको थियो । बर्दीको आडमा तस्करबाट बरामद ३५ तोला सुन लुकाइएको आरोप लगाइएको छ । पक्राउ परेदेखि नै उनी निलम्बनमा छन् ।

उनीमाथि छानबिन गर्न तत्कालीन एसएसपी चन्द्रकुवेर खापुङको नेतृत्वमा गठित समितिले केसीलाई फौजदारी कसुरमा मुद्दा चलाउन सिफारिस गरेको थियो । 

केसीको सम्पत्तिहरुको विवरण, बैंकिङ स्टेटमेन्टलगायत सबै विवरण अख्तियारले अनुसन्धान गरिसकेको छ । सो क्रममा भ्रष्टाचारजन्य काम गरेको पुष्टि हुने आधारहरू भेटिएको जनाउँदै मुद्दा दर्ताको तयारी गरिएको हो ।