सेनाको संख्यालाई सापेक्षित रुपमा हेर्नुपर्छ : रक्षामन्त्री खडका

११ असार, काठमाडौं । उपप्रधान तथा रक्षामन्त्री पूर्णबहादुर खड्काले सेनाको संख्यालाई निरपेक्ष रुपमा नभई सापेक्षित रुपमा हेर्नुपर्ने बताएका छन् । 

मन्त्रालयगत बजेटमाथि सोमबार बसेको प्रतिनिधिसभाको बैठकमा सांसदहरुले उठाएका प्रश्नहरुको जवाफ दिने क्रममा रक्षामन्त्री खड्काले सुरक्षा परिषद्को सिफारिसमा सरकारले सेनाको संख्याबारे निर्णय गर्ने कानुनी व्यवस्था रहेको बताए । सेनाको संख्याको अद्यावधिक पनि यसैका आधारमा हुने उनले स्पष्ट पारे । 

उनले भने, ‘संविधान तथा कानुनले सुम्पिएको जिम्मेवारी, सरकारद्वारा समय–समयमा तोकिएका अन्य जिम्मेवारी, अन्तर्राष्ट्रिय रुपमा शान्ति स्थापना कार्यमा सक्रिय रहँदा गर्नुपर्ने कार्य, मुलुकको भौगालिक अवस्था, अन्तर्राष्ट्रिय परिवेशका आधारमा नेपाली सेनाको संख्या निर्धारण हुने भएकाले हामीले निरपेक्ष रुपमा हेर्नुहुन्न’ उनले भने ।

उनले सेनाको तलब यो आर्थिक वर्षको बजेटमा वृद्धि नगरिएको तर विचार गर्नुपर्ने अवस्था रहेको बताए । सेना शान्ति मिसनमा जाने क्रमलाई बढाउने विषयमा सरकारको ध्यान गएको बताए ।