बजेट असन्तुलित भएको भन्दै पर्यटनमन्त्री किरातीले मागे संसदमा माफी

११ असार, काठमाडौं । संस्कृति, पर्यटन तथा नागरिक उड्डययन मन्त्री सुदन किरातीले आफ्नो मन्त्रालयका लागि आगामी आर्थिक वर्ष २०८०/८१ का लागि अर्थमन्त्रालयले छुट्याएको बजेट असन्तुलन रहेको स्वीकार्दै माफी मागेका छन् । 

उनले आफूले सक्दो प्रयास गर्दागर्दै हरेक जिल्लामा बजेट पुर्याउने योजना पुरा गर्न नसकेको र यसैकारण सांसदहरुले दुःख व्यक्त गर्दै मन्त्रीको विरोध गरबाट आफू ‘महादुःखी भएको बताए । 

भोजपुरबाट निर्वाचित किरातीमाथि मन्त्रालयको बजेट गृहजिल्लामा अन्याएको भन्दै मन्त्रालयको विनियोजित बजेट शीर्षकमाथिको छलफलमा सांसदहरुले आलोचना गरेका थिए । उनले आजको प्रतिनिधिसभाको बैठकमा प्रश्नको जवाफ दिने क्रममा अर्थ मन्त्रालयबाटै पर्यटन मन्त्रालयअन्तर्गत क्रमागत बजेट समेत कटाएको जानकारी दिए ।

बजेट असन्तुलित हुन जानुमा आफ्नो कुनै दोष नरहेको तर विभागीय मन्त्रीको हैसियतले आफूले सदनमा माफी मागेको स्पष्ट पारे । साथै छुट्याइनुपर्ने स्थानमा बजेट पार्न नसक्दा आफूलाई आत्मग्लानी महसुस भएको बताए ।