प्रधानन्यायाधीश कार्कीको मातहतमा बस्न असहज हुने भन्दै न्यायाधीश भट्टराईले दिए राजीनामा

११ असार, काठमाडौं । जिल्ला अदालत काठमाडौंका न्यायाधीश डा. श्रीकृष्ण भट्टराईले नैतिकताका कारण देखाउँदै पदबाट राजीनामा दिएका छन् ।

आफैंले कानुनी र नैतिक रुपमा प्रश्न उठाएको व्यक्ति प्रधानन्यायाधीश भएको भन्दै उनले प्रधानन्यायाधीश हरिकृष्ण कार्कीको मातहतमा बस्न असहज हुने भन्दै सोमबार राजीनामा दिएका हुन् । 

कार्की प्रधानन्यायाधीश नियुक्तिका लागि संवैधानिक परिषदबाट सिफारिस हुँदा भट्टराईले संसदीय सुनुवाइ समितिमा सिफारिस प्रक्रिया र कार्कीको योग्यतामा उजुरी दिएका थिए । सुनुवाइपछि समितिले कार्कीलाई प्रन्यामा नियुक्त गर्ने निर्णय गरेपछि उनी हालै मात्र प्रन्या नियुक्त भएका हुन् । 

भट्टराईले संसदीय सुनुवाइ समितिले विवेक प्रयोग गर्न नसकेको उनको आरोप लगाउँदै आएका छन् । मुख्यगरी उनले सुनुवाइ समितिको नियमावली संसदबाट पारित भएपनि नेपाल राजपत्रमा प्रकाशन नभएका कारण समितिले लिने निर्णय अवैध रहेको दाबी उनको छ ।