सन्दीपविरुद्धको बलात्कार मुद्दा : पीडितलाई उपचार खर्च दिन अदालतको आदेश

११ असार, काठमाडौं । क्रिकेटर सन्दीप लामिछानेविरुद्ध जिल्ला अदालत काठमाडौंमा विचराधीन बलात्कारसम्बन्धी मुद्दामा पीडितलाई उपचार खर्च भराउन आदेश दिएको छ ।

न्यायाधीश प्रकाशप्रसाद पण्डितको इजलासले पीडित राहत कोषबाट पीडित (गौशाला २६)लाई अन्तरिम राहतस्वरुप उपचार खर्च दिन सोमबार आदेश दिएको हो ।

अस्पतालका चिकित्सकको बकपत्र समेत गरेपछि अदालतले उपचार गर्दाको खर्च उपलब्ध गराउन आदेश दिएको हो । अदालतकाे यसअघिका आदेशबमाेजिम पीडित पक्षले बालात्कार घटनापछि शारीरिक र मानसिक स्वास्थ्यको उपचारका क्रममा ७० हजार रुपैयाँ खर्च भएको भन्दै बिल पेश गरेकी थिइन् । 

आरोपित सन्दीप लामिछानेका कानून व्यवसायीहरुले भने उनलाई उपचार खर्च दिने निवेदनमाथिको बहसमा बलात्कार मुद्दा अन्तिम टुंगो लागिनसकेको अवस्थामा राहत दिन नमिल्ने बहस गरेका थिए । सन्दीपविरुद्ध बलात्कार कसुरसम्बन्धी मुद्दाको अन्तिम सुनुवाइ हुने चरणमा रहेको छ ।