कोशीमा आफूहरुको नेतृत्वमा सरकार गठन गर्ने विपक्षीहरुको निर्णय

११ असार, काठमाडौं । कोशी प्रदेशमा विपक्षी दलहरुले आफूहरुको नेतृत्वमा नयाँ सरकार गठन गर्ने निर्णय गरेका छन् । प्रदेश प्रमुख परशुराम खापुङबाट प्रदेशसभाको बैठक आह्वान भएलगत्तै सोमबार बसेको विपक्षी दलका नेताहरुको बैठकले यस्तो निर्णय गरेको हो । 

नयाँ सरकार गठनका लागि नेपाली कांग्रेस, नेकपा (माओवादी केन्द्र) र जनता समाजवादी पार्टी (जसपा)का नेताहरुको आज काठमाडौंमा बसेको बैठकले नयाँ सरकार गठनको औपचारिक बाटो तय गरको हो । 

हाल अल्पमतका मुख्यमन्त्री हिक्मतबहादुर कार्की एमालेबाट बनेका हुन् र माओवादी केन्द्र, जसपाले समर्थन फिर्ता लिएपछि उनी अल्पतमत परेका छन् । उनले यही असारको १६ गते भित्र प्रदेशसभामा विश्वासको मत लिन प्रस्ताव पेस गर्नुपर्ने संवैधानिक व्यवस्था छ । बैठक १४ गतेका लागि आह्वान भएको छ ।

बैठकमा कार्कीकाे विश्वासको प्रस्ताव फेल गराउने निर्णय बैठकले गरेको कांग्रेस नेता केदार कार्कीले बताए ।

विपक्षी दलकाे विराेधका बाबजुद मुख्यमन्त्री कार्कीले अल्पतमा परेका बेला अध्यादेशबाट प्रदेश सरकारको आगामी आवको नीति तथा कार्यक्रम र बजेट सार्वजनिक गरिसकेका छन् ।