अनिवार्य बैठकमा उपस्थित भएर बजेटको पक्षमा मतदान गर्न कांग्रेस ह्विप

१२ असार, काठमाडौं । नेपाली कांग्रेसले बजेटका पक्षमा मतदान गर्न आफ्ना सांसदहरुलाई निर्देशन दिएको छ ।  कांग्रेस प्रमुख सचेतक रमेश लेखकले आर्थिक वर्ष २०८०/८१ को बजेटको पक्षमा मतदान गर्न आफ्ना सांसदहरूलाई निर्देशन दिएका छन् । 

लेखकले सांसदहरूलाई विनियोजन विधेयक निर्णयार्थ प्रस्तुत हुने दिन अनिवार्य उपस्थित हुन तथा पक्षमा मतदान गर्न र तटस्थ नरहन ह्विप जारी गरेका हुन् । बुधबार असार १३ गते बिहान ११ बजे प्रतिनिधिसभाको बैठकमा विधेयक निणयार्थ प्रस्तुत गर्ने सरकारको तयारी छ । 

बजेटप्रति सत्तारुढ दलकै सांसदहरूले असन्तुष्टि व्यक्त गरिरहेका छन् । यद्यपि, सत्तारुढ दलका शीर्ष नेताहरूबीच बजेटमा देखिएको असन्तुष्टि सम्बोधन गर्ने विषयमा सहमति गर्ने प्रयास भइरहेकहो छ ।  आगामी बजेटमाथि विभिन्न दलका सांसदहरुले असन्तुष्टि जनाएका छन् ।