लम्पी स्किनविरुद्धको भ्याक्सिन स्थानीय तहमार्फत वितरण हुने व्यवस्था गरेका छौं : मन्त्री भुसाल

१२ असार, काठमाडौं । कृषि तथा पशुपंक्षी मन्त्री वेदुराम भुसालले पशु चौपायामा महामारी रुप लिएको लम्पीस्किन रोगविरुद्धको भ्याक्सिन स्थानीय तहमार्फत किसानको घरगोठसम्म पुर्याउने व्यवस्था गरिएको बताएका छन् । 

मन्त्रालयमाथि आगामी आवका लागि विनियोजित बजेटमाथि सांसदहरुले उठाएका प्रश्नको प्रतिनिधिसभाको मंगलबारको बैठकमा जवाफ दिँदै मन्त्री भुसालले लम्पीस्किनविरुद्धको भ्याक्सिन किसानसम्म पु्रयाउन विभिन्न कम्पनीमार्फत भ्याक्सिन आयात गरिएको र त्यसलाई किसानका गोठसम्म पुर्याउने काम भइरहेको बताए । साथै रोग लागेका पशुका शरीरमा उठ्ने गिर्खा र फोकामा लगाउने तथा उच्च ज्वराेमा आउँदा खुवाइने  औषधी पनि स्थानीय तहमार्फत नै वितरण हुने व्यवस्था गरिएको उनले जानकारी दिए ।

रोगका कारण गोरु बिरामी परेपछि पहाडी क्षेत्रमा किसानलाई धान रोपाईमा समस्या परेको छ । औषधि भ्याक्सिन (खोप) छिटो उप्लब्ध गराउन किसानहरुले माग गर्दै आइरहेका छन् । राेगले गाई, भैंसी, गाेरूमा व्यापक संक्रमण फैलिएकाे छ । भ्याक्सिन महंगाे भएकाे भन्दै सर्वसुलभ मूल्यमा उप्लब्ध गराउन माग गरेका छन् । 

रोग मुख्य गरी ३ महिनादेखि महामारीको रुप लिएको र २ महिनामै भ्याक्सिन ल्याउने काम भएको बताए । उनले यो रोगविरुद्ध पशुलाई खुवाउने औषधी, दिइने भ्याक्सिन उत्पादन देशभित्र नरहेका कारण उप्लब्ध गराउन ढिलाई भएको बताए । सरकारले भ्याक्सिन खरिदका लागि १० करोड ६० लाख  रुपैयाँ बजेट छुटइएको जानकारी दिँदै हाल जोर्डन, तान्जनिया र टर्कीबाट भ्याक्सिन झिकाइएको मन्त्री भुसालले जानकारी दिए । हालसम्म ७ लाख ९७ हजार डोज ल्याइसकेको बताए । 

उनले हालसम्म लम्पीस्किनबाट ६ लाख ११ हजार २०१ पशु चौपाया संक्रमित भएको र २१ हजार ७ सय १३ पशु मरेको जानकारी दिए । तिमध्ये २ लाख बिरामी अवस्थामा रहेको बताए । नेपालमा पहिलोपटक २०७७ सालमा लम्पीस्किन रोग देखा परेको थियो । यो रोग विश्वमा पहिलोपटक अफ्रिकामा देखा परेको थियो ।